Ang biyuda sa panahon sa atong Ginoo giisip mang sakop sa marginalized sector sa katilingban.
Gani sa ilang panahon mahimong malisod alang nila ang pagpakabuhi kay mag-agad raman gyud sila sa mga lalaki nga maoy mobuhi nila.
Mao bitaw nga ang levirate marriage maoy nauso kaniadto. Nga sa ato pa, ang igsuong lalaki sa namatay nga bana o dili ba kaha ang iyang first degree cousin ang dunay obligasyon sa pagpangasawa sa biyuda kini aron mabuhi ang biyuda ug mahatagan sa iyang inadlaw-adlaw nga panginahanglan.
Ang biyuda nihulog sa usa ka dako. Sa halaran. Sa laktod nga pagkasulti gihatag niya ang substantial part nga iyang gikinahanglan aron sa ingon duna siyay matampo sa panginahanglan sa templo.
Nakita ko sa telebisyon nga dunay person with disability o PWD ang nihatag sa tanan niyang kinitaan ngadto sa usa ka relief center sa dihang nagdala og dakong kadaut ang bagyo nga si Rolly.
Mga tawo nga ubos ug sila mismo naglisod ang nihatag sa bisan unsa nga ilang nahuptan makatabang lang gyud sa panginahanglan sa uban. Ingon ini sila kamanggihatagon.
Kay unsa man diay ang kamanggihatagon? Ang kamanggihatagon nagdapit kanato sa paghatag bisan sa atong dakong kalisud. Nakahatag kita dili tungod kay duna kitay sobra.
Nakahatag kita tungod kay nibuot kita nga mopaambit sa bisan unsa nga ania kanato.
Ang maong pagpaambit nagagikan o nagasukad diha sa paghigugma.
Ang gugma mao lamang ang naghatag kanato og kadasig sa paghimo og maayo taliwala sa dakong kalisdanan.
Ang pagkamanggihatagon dili lang nato ma-limit sa mga butang o sa salapi. Apil na usab niini ang atong panahon ingon man ang atong kaugalingong kaantigohan.
Ang paghatag sa ingon usa man ka pagpadayag nga kay kita nihatag ug nipaambit, mahinungdanon kaayo alang nato ang maong tawo o mga tawo nga nahimong kabahin sa atong kinabuhi bisan sa daklit lamang.
Diha sa pagpanghatag gawas sa gugma mas maayo nga ato kining pakapinan usab og kalipay.
Kay kun wala kitay kalipay nan, malisud ug bug-at kaayo alang kanato ang pagpaambit.
Ning panahon sa dakong pandemiya mahinungdanon kaayo nga anaa sa gihapon ang kalipay bisan pa man kun malisod ang tanan alang kanato.