Dear Atty. Divine,
Duna koy pangutana labot sa sitwasyon sa akong mama ug papa. Dugay na ni si papa nga akong nahibaw-an nga adunay laing babaye. Wa ko masayud kun nahibawo ba sad si mama niini kay wa man siya mo open nako. Apan mora og obvious gyud kaayo nga naay laing pamilya si papa kay naa may panahon nga di siya mouli ug ang iyang rason nga kuno nagbiyahe siya. I think, ang babaye nasayud nga minyo si papa. Hinuon wa man mi gi-abandon ni papa pero ako maoy masakitan sa part sa akong mama. Ang akong pangutana kun pwede ba og akong pasakaan og kaso ang laing babaye sa akong papa ug ako mismo ang mo file niini? Di lang unta nako iapil og kiha akong papa, mahimo ba kana? Daghang salamat. —Annie,
Dear Annie,
Basi sa Article 344 sa atong Revised Penal Code, kun ang minyo nga lalaki mangabit mamahimo kining pasakaan og kasong Concubinage. Samtang kun ang babayeng minyo masakpan sab nga nakigrelasyon og laing lalaki mamahimong pasakaan og kasong Adultery. Basi sa balaod kun ang minyo nga lalaki nakigrelasyon og laing babaye , silang duha sa iyang karelasyon ang kinahanglang ikiha og Concubinage, mao sab kini ang mo-apply sa kasong Adultery kinahanglan nga ang duha gyud ang ikiha. Busa sa imong pangutana kun mamahimo bang ang laing babaye ra sa imong papa ang ikiha, dili kini mahimo. Samtang sa imong ikaduhang pangutana kun pwede ba nga ikaw isip anak maoy mo file og kaso? Ang tubag niini dili, kay kinahanglan gyud nga ang mo-file og kaso mao ang legal wife or legal husband nga maoy na agrabyado. Thanks and God bless. —Atty. Divine
* * *
Alang sa inyong pangutana, palihug lang sa pag-email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.