Supernatural

Magpalain usa ta kay kagahapon, mao man ang All Souls’ Day, ug kay wa man ko’y lindog gahapon, karon lang nato hisgotan ang mga supernatural.

Daghang klase sa supernatural, sama sa mga engkanto, agta, duwende ug ang espiritu sa mga tawo nga gitawag og kalag.

Tinuod ba gud nga duna gyuy kalag? Unya makig-estorya’g tawo?

Kadaghan na ko makadungog ug gani makakita ta diha sa mga episode sa TV show nga mga tawo magpadala sa ilang kaagi nga nakahinabi sila og kalag. Pero wa lang dayon ko motuo.

Karon, napugos ko’g suwat niini kay ang kauban namo sa media nga si Jeanette Malinao, maoy nagsaysay sa iyang kaagi ug sa manghod niya nga babaye nga kaniadto nasudlan og kalag.

Kalit lang nakuyapan ang manghod ni Jeanette sulod sa ilang balay sa Talamban, ug bisan giunsa nila pagtabang, wa gyud maulii, mao nga gidala nila sa ospital kay di makasulti ang iyang manghod.

Apan bisan unsa na lay gihimo sa mga doktor, lainlaing laboratory examinations, apan way nakitang sakit sa manghod ni Jeneatte.

Paggawas nila sa ospital, midangop na sila sa mga “Binisaya” nga pagtambal.

Gihimo ang way hunong nga pagpangadye duol sa iyang manghod, ug hangtud nga nakabantay sila’g dili kasagaran nga panghitabo.

Makasulti na tuod ang iyang manghud, apan dili kini maoy iyang tingog.  

Ang kalag nga nagpaila nga siya si Divina, nga misulod sa lawas sa manghod ni Jeneatte, misaysay, nga sila taga Ormoc apan gipaeskwela siya sa iyang mga ginikanan sa usa ka “exclusive school for girls” dinhi sa Cebu.

Natawo si Divina Enero 9, 1923. Mga 18-anyos si Divina niadto, nga naglakaw siya sa mingaw pa nga karsada sa Talamban paingon sa iyang gipuy-an, ug kalit siyang gihunongan sa truck nga may daghang lalaki nga sakay. Gipugos siya pagpasakay, ug gidala sa mga nagdagit kaniya sa usa ka dapit diin didto siya gitabangan paglugos, Dayon, gitambog si Divina sa daw lupa nga bahin sa Talamban ug gidakdakan pa og bato.

Gituohan nga wa gyud makit-i ang patayng lawas ni Divina kay wa pa kaayo’y namuyo sa Talamban niadtong higayona, hangtud nga natabonan na lang sa mga lapok ang iyang lawas.

Paglabay sa katuigan, daghan na nga namuyo ug nagtukod og kabalayan sa dapit nga gilabayan sa lawas ni Divina, ug ang mga ginikanan ni Jeneatte maoy nakatukod sa mao gyud nga lugar.

Miabot ang higayon nga nakahunahuna ang mga ginikanan ni Jeaneate nga sementohon ug ilang i-tiles ang sawog sa ilang balay ug diha na nga ang kalag ni Divina wa mahimutang. (Taposon nato kini karong Huwebes)