Naa karon sa hot water ang Ceres Liner tungod sa sunodsunod nga aksidente ang gilambigitan sa mga bus ilabi na sa dakbayan sa Sugbo.
Ang labing uwahi mao ang panagbangga sa ilang bus ug sa ambulansya nga adunay sakay nga pasyente diin siyam ka tawo ang naangol ,apil na ang mga sakay sa Ceres.
Tungod niini, dunay uban nga misugyot nga dili nalang kaha tugotan sila nga mobiyahe sa pusod sa syudad kay lagi murag kuwang sa disiplina ang mga drivers kay moliutliot gyud aron makalusot bisan apeki kaayo ang karsada.
Seguro dunay mga driver nga balasubas nga walay pakialam sa ubang motorista kay nagsalig nga higante sila bahala nalang ang uban nga mo-adjust nila.
Para kanako dili usab angayan nga i-ban ang tanan kay daghan kaayong sumasakay nga maapektohan.
Ako lang ipaambit ang akong kasinatian dihang nag-commute ko padulong ug pauli sa trabahoan kay lagi na-shop man ang akong sakyanan.
Naglinya ko sa terminal sa IT Park para sa biyahe sa Lapu-Lapu, kaingon nako og madugay kay taas naman ang linya. Pero pag-abot sa bus naigo man og kasakay kaming tanan with social distancing sa bus.
Hayahay kaayo sa sulod kay luag man, ang tanan naka mask ug shield, walay estoryanay ug dali usab ako nakaabot sa akong distinasyon.
In fairness, courteous ang conductor nga mo-ticket ug mangolekta sa plete nga dili na kinahanglan pa nga motunoltunol sa kwarta sa ubang pasahero.
Dili nako ma-imagine kong wala ang Ceres bus mobiyahe, unsa nalang ang mahitabo sa mga yanong tawo nga nagsalig sa ilang serbisyo?
Naa lagi mga taxi pero dili ka afford ang kinabag-an sa mahal nga plete, limitado usab ang ubang modern PUJ nga nagdagan.
Kadtong moingon nga i-ban ang Ceres bus sa Cebu Cuity ilabi na sa social media wala gyud silay idea unsa ka gamit ang mga bus karong panahona.
Kutob lang sila sa yawyaw sakay sa issue kay wala sila makasuway og atang daplin sa dalan, mag linya sa terminal aron lang makaadto sa trabaho ug makapauli sa balay.
Busa mas maayong ipadayon ang ilang serbisyo, apan gikinahanglan lang seminaron ang mga balasubas nilang driver aron malikayan ang disgrasya sa kadalanan.