Ug napusgay ang buwa sa PBA
Nagduda na kong daan unsa kaandam ang mga tagduma sa Philippine Basketball Association (PBA) sa pagpasiugda sa ilang kaugalingong bubble sa Clark City sa Pampanga dihang nipasalig nga mas higpit ang ilang mga lagda kay sa gipatuman sa malampuson nga bubble sa National Basketball Association (NBA) sa Florida.
Kay unsaon man nila paglabaw sa kamabinantayon sa NBA nga niggasto sa pagtukod og laboratoryo nga makaila sa COVID-19 sud lang sa pila ka takna? Gani ang nakaplagan nga teknolohiya sa saliva test gipagamit na sa NBA sa ubang kanasuran.
* * *
Nisamot ang akong pagduda sa PBA bubble pagkahibawo nga PCR test ug antigen rapid test ang gisaligan pagsusi wa bay tinakdanay sa kagaw sa mga magduduwa ug sa gipasud nga mga opisyal ug mga kawani.
Kay ang PCR test maabtan og pila ka adlaw ang resulta, maong gikataho nga gihimo kausa ra matag semana.
Samtang ang antigen test nga may resulta sa pila ka takna gideklarar sa Department of Health (DOH) nga di kasaligan. Maong di ikahibulong nga nag-positibo sa COVID-19 ang usa ka referee ug usa ka magduduwa.
* * *
Nawagtang ang akong pagsalig nga nahibawo ang PBA sa ilang gihimo dihang gideklarar nga false positives ang referee ug magduduwa pinasikad sa antigen tests. Ambot nauwaw ba dihang gipahinumdoman sa DOH nga mas kasaligang PCR kay sa antigen.
Nakumbinser kong kuwarta ray giapas sa PBA sa pagpaduwa sa duha ka teams nga nakaduol sa referee.
Dihang nag-positibong magduduwa, ayha pa gi-quarantine ang iyang team ug ang team nga ilang gikaabot apan gipaduwa gihapon ang unang team nga ilang gika-engkuwentro uban sa referee.
* * *
Nagduda pa gyod kong pagarpar ray nag-ayo sa PBA dihang nipasalig si Commissioner Willie Marcial nga higpitan ang pagpatuman sa mga lagda sa bubble ug multahan nang mga makalapas. Sa ato pa, may nangagi na ba diayng kalapasan nga ilang gilingiwan?
Malampusong natapos ang NBA bubble nga way bisan usang natakdan sa COVID-19. Apan may magduduwa nga gipalagpot sa bubble kay nagpasud og babayeng kawani sa iyang kuwarto. Wa ta kadungog og samang insidente sa PBA bubble. Apan mahimong may laing nahibaw-an ang Inter-Agency Task Force (IATF) kay gipahunong na man gyod ang tanang duwa.
* * *
- Latest
