Sa dihang pasirad-an ang sam-ang

Gimando sa IATF nga karong Oktubre 29 hangtud na sa Nobiyembre 4, 2020 pagatak-upan ang mga sam-ang aron paglikay sa kahigayonan sa COVID-19 nga mokuyanap. Mao nga karon pa lang daan akong gidasig ang mga parokyano nga moduaw na sa mga lubnganan ug mohalad og pipila ka mga pag-ampo.

Nahimong abnormal ang tanan sa dihang niabot ang coronavirus disease. Kay kun wala pa lang kini, padayon unta kita sa atong mga naandang mga bulohaton. Apil na niini ang mga pagduaw ug pagpundok sulod sa mga sam-ang sa nagkadaiyang mga dapit sa atong kapupud-an.

Walay laing nahimo mao lamang ang paghalad og mga pag-ampo alang kanila nga nangamatay na. Dinhi sa amoa, among gipasiugdahan ang mass forms diin among isulat ang mga ngalan sa mga nangamatay ug basahon kini namo sulod sa usa ka tuig. May matag Lunes, kada adlaw ug dunay perpetual.

Tumong niini mao man ang pagtudlo sa mga hingtungdan nga dili lang kini mahitungod lang sa ilang donasyon nga mahatag kondili mahitungod usab sap ag-ampo nga maoy sarang gikinahanglan sa tanang mga kalag. Ako mismo dunay personal nga debosyon sa mga balaang mga kalag sa purgatoryo. Mao nga subo lang gyud kaayo palandungon nga nahitabo kini.

Ang COVID-19 dako gyud kaayo og kadaut nga nahimo ngari kanato. Daghan kaayo kini og epekto sa matag usa kanato sa ekonomiya ug pagtuo. Ning maong kapasikaran daghanan kanato ang nahimong mga biktima mismo sa atong tinguha nga makalingkawas gikan sa kalisod gumikan ning virus.

Apan sa atong dakong tinguha nga makalingkawas nahimo naman nuong padayon ug masubsob ang pagpanglutos mismo sa mga tawo nga atong gisaligan nga motabang gyud unta kanato. Dili ba lisod dawaton?

Hinuon sa akong padayon nga pagpatidlum nakita ko kun unsa ra gyud kamubo sa kinabuhi natong mga tawo. Malisud kaayo ang pagpuyo diha sa pamasin nga ang tanan mamahimong normal human sa mga panghitabo labina kun kining mga hitaboa planado kaayo.

Apan bisan pa niini, ako malaumon nga ang gahum sa Dios maoy mopatigbabaw. Kay dili gyud mahitabo nga ang gahum sa dautan magmadaugon batok sa gahom sa maayo. Mingaw man tuod ang mga sam-ang karon apan ingon nga mga katilingbang maampoon atong gipaulanan sa atong mga pag-ampo. Ning paagiha nahimong daw sa mahugmak na gyud unta ang gahum nga yawan-on.

Nibalik na gyud si Geneva ang yawa nga kusog kaayo ang kaligutgot sa simbahan. Buot niya kining sunogon ug dauban. Apan dili mahitabo nga siya magmadaugon kini tungod kay lig-on ug mas gamhanan ang Dios.