Hilabihan ka dako sa leksiyon nga atong nakuha human nga milampurnas ang mga pagbaha atol sa grabe nga pag-ulan nga mikutlo og tulo ka kinabuhi ug miapekto sa liboan ka molupyo sa dakbayan sa Sugbo sa niaging mga adlaw.
Nag-una niini mao nga ang mga pagbaha nga atong nasinati panahon sa ting-ulan bunga sa kakulang sa atong mga opisyal kaniadto pagplano sa maayong sistema sa drainage nga miresulta sa mga pagbaha sa ubang mga lugar sa siyudad karon.
Ikaduha mao usab ang pagkawalay disiplina sa pipila nga anaa nagpuyo sa daplin sa mga sapa kinsa walay puangod nga nagpataka lamang og labay sa ilang mga basura nga miresulta sa pagkabara sa mga creek ug kanal.
Kun padayon kining seryosong suliran sa pagkabara sa atong mga sapa ug kanal, mas makapaabot kita og dugang pa nga mga trahedya sa pagbaha sa dakbayan. Ug ang labing alaot niini mao mismong kadtong mga ordinaryong molupyo.
Panahon na nga mohimo og lakang ang atong mga lokal opisyal pagsulbad niining seryosong problema sa pagbaha sa dakbayan nga sa pipila ka dekada wala hatagi og dakong pagtagad sa nangaging mga administrasyon.
Hinuon misaad si Mayor Edgardo Labella nga iyang susihon nganong ingon niadto ka grabe ang pagbaha sa dakbayan.
Gani iyang giwarningan kadtong mga nakabara sa mga creek ug kanal nga iyang itaral ngadto sa hukmanan tungod sa ilang kalapasan.
Maayo kini nga lakang sa mayor. Kay kun dili sila tinud-on, mag-anad na hinuon kining mga violator kay lagi, alang kanila, walay ngipon ang balaud.
Dili lamang kana. Panahon na nga mohimo ang dakbayan og konkreto nga aksiyon batok niining problema sa mga pagbaha pinaagi sa pagpalambo sa sistema sa drainage.