Nasayod na ko kon nganong misuyla ang tubig gikan sa sapa ug nakamugna og lunop sa General Maxilom Avenue ug ngadto sa daghang kabalayan sa Barangay Zapatera ug Lorega-San Miguel kaniadtong Martes sa gabii.
Gipakita ni Cebu City Councilor Jerry Guardo nga ang sapa ilawom nianang hotel sa General Maxilom Avenue dapit sa eskena Rahman Street (kanhi San Jose Street), gitabonan ug nahisama na og kahon.
Kadtong Martes nga pwerteng kusoga sa uwan ug dako kaayo ang baha gikan sa Lahug ug Kamputhaw river, pag-abot diha sa sapa ilawom sa hotel, misuyla ang tubig ug didto mipaingon sa karsada.
Miabot og taga hawak ang tubig sa karsada ug nahimong sapa ang General Maxilom Avenue ug ang Echavez Street, ug ang kabahin sa Barangay Zapatera ug Lorega gipanglunopan.
Ang pangutana kon ngano nga ang mga opisyal sa dakbayan sa Sugbo nga naglingkod sa Office of the Building Officials (OBO) atol nga gitukod ang hotel, wa man mobadlong? Dunay uban nga nagduda kon wa ba kaha gitingal?
Ambot og unsay himoon niini sa kagamhanan sa siyudad, pero kon ako maoy pagbut-on, kinahanglang ipatuman gyud ang balaod.
Dili ba hilas kaayo nga mangusog ta sa pag-ingon nga gub-on nato ang mga balay nga gitukod sa tres metros gikan sa tampi sa sapa, unya anaay mga gitukod gyud mismo ibabaw sa sapa, dili kita makahimo’g aksyon?
Niining isyuha, angay’ng ipakita gyud sa administrasyon ni Mayor Edgar Labella nga ang iyang pamunoan dunay ngipon nga mopatuman sa balaod.
Abogado si Mayor Labella ug nasayod siya unsay mga pamaagi aron maguba ang mga gipangtukod ibabaw, o kaha daplin sa kasapaan, ma-balay man o building, sa way pagpinig kon ma-dato man, o pobre ang mga tag-iya.
Ug niining isyuha, kinahanglan nga kadtong mga tag-iya sa kabalayan nga gipanglunopan sa miaging Martes, maghiusa aron nga mobarug sila ug awhagon ang mayor nga dalion pagtagad ang maong kahiwian.
Pagsuwat nako niining maong lindog kagahapon, nibunok na usab ang kusog nga uwan diri sa bukid, ug tingali apil sab sa ubang bahin sa siyudad.
Tingali, kadtong mga nagpuyo sa mga dapit nga gipanglunopan niadtong Martes sa gabii, gipangkulbaan na sab nga basin og lunopan pagbalik ang ilang mga dapit.
Mao nga kamong mga opisyal sa kagamhanan, apil sa dakbayan sa Sugbo, himoa gyud ninyo ang inyong katungdanan aron mapanalipdan ang katawhan gikan sa dakong sakripisyo tungod sa abuso sa pipila ka tawo.
Kon inyo kining mahimo, humot kaayo kamo kanila panahon nga mangayo na usab kamo sa ilang bendisyon atol sa subli ninyong pagpapili sa katungdanan.