Swapang

Taliwa sa kadaghan sa ilang gimbuhaton nunot sa nagpadayon pa untang deliberasyon sa budget sa nasud alang sa sunod tuig, mas gipili ni Speaker Alan Peter Cayetano nga isuspenso ang session sa House of Representatives hangtud sa Nobyembre 16.

Iyang pakonswelo aron di kapasanginlang gi-hostage ang national budget tungod sa iyang tinguha nga magpabilin sa katungdanan isip speaker, mao ang pagpanglaktud sa proseso ug pagpasar niini sa second reading bisan wala pa mahuman ang deliberasyon.

Ilang giumil ang komitiba nga maoy modawat sa mga sugyot nga amendments inay nga himuon ni didto sa hawanan sa ubos balay balauranan sa dayag ug tataw nga paagi.

Tungod sa gihimo ni Cayetano nahikawan ang publiko nga masaksihan ang deliberasyon sa labing importante nga balaudnon sa nasud sanglit pinaagi niini makita sa katawhan unsaon paggasto ang ilang buhis.

Tataw nga ang gihimo ni Cayetano usa ka minaro nga paagi aron di motuman sa kasabotan nga gipasiugdahan ni Presidente Duterte tali nilang Kongresista Lord Allan Velasco.

Abunda ang mga timailhan nga di gustong itugyan ni Cayetano ang pagka-speaker hinungdan nga iyang gisuspenso ang session.

Tataw nga buot niyang way session nga mahitabo karong Oktubre 14, ang petsa nga gitakdang mopuli na sa katungdanan si Velasco sigun sa ilang kasabutan.

Tungod sa kahakog ni Cayetano sa gahom, namiligrong mapagan ang pagpasar sa nasudnong budget sa tukmang panahon.

Nagpunay og pasalig si Cayetano nga dili malangan ang pagpasar sa budget apan wala niya hunahunaa nga duna nalay kapin sa duha ka buwan ang nahabilin sa dili pa matapos ang tuig.

Gikan sa Ubos Balay Balauranan moagi pa ang budget og deliberasyon sa Senado ug sa bicameral conference sa dili pa mahimong final.

Ug tungod sa kabaga sa mga dokumento nga kinahanglang tun-an sa mga magbabalaud, wa pay labot ang mga pagkutikuti unya niini sa mga senador nga sakop sa opisisyon, nabalaka ko nga kuwang na ang nahabiling panahon aron mapasar ang budget sa dili pa matapos ang tuig.  Importante nga mapasar ang budget sa dili pa matapos ang tuig tungod kay gikinahanglan sa mga ahensiya sa gobiyerno ang pundo taliwa sa pandemya nga atong nasinati.

Angayan untang gipatigbabaw ni Cayetano ang interest sa nasud kay sa iyang personal nga ka swapang sa pwesto.

Way laing tukmang termino paghulagway sa gipakitang taras ni Cayetano gawas sa “swapang.”

Sigun sa term-sharing agreement nilang Cayetano ug Velasco, si Cayetano maoy unang molingkod isip speaker sulod sa 15 ka buwan.

Human niini mobanos si Velasco ug tiwason ang nahabiling 21 ka buwan sa dili pa ang sunod nga Kongreso human sa 2022 nga eleksiyon.

Si Presidente Duterte mismo maoy ni-broker sa kasabotan apan karon nga nahuman na ang iyang turno dili na ganahan si Cayetano nga mokanaog sa pwesto.

Si Presidente Duterte mibahad, kinahanglang taposon na nilang Cayetano ug Velasco ilang panag-ilog sa pwesto.

Matud sa presidente siya maoy mosulbad sa problema kun dili mahimo sa duha.

Kun kini mahitabo posibleng mauwawan lang si Cayetano tungod kay daan na nga mipadayag ang presidente nga buot niyang tumanon niini ang term-sharing agreement.

Bisan sa iyang pangangkon nga mayoriya sa mga kongresista misuporta niya, dili ni garantiya alang ni Cayetano kun manghilabot na ang Malakanyang.