Wa na’y saba

Nalipay ko nga gidili na ang pagsabasaba atol sa weekdays, sama sa pagkanta gamit ang video karaoke, o kaha pagkanta gamitan og amplifier, gikan sa Lunes hangtud sa adlaw’ng Biyernes.

Gitumong kini aron nga dili matugaw ang kabataan nga nag-online classes diha ra sa ilang tagsa-tagsa ka panimalay. Ang pagkanta gamit ang video karaoke ug amplifier, gitugot ra sa Sabado ug Domingo.

Aw, kadtong dili gyud makapugong sa pagkanta, gastohi na lang ninyo ang pagpahimo og sirado gyud nga kwarto nga adunay mga “sound reduction devices” aron dili kamo makatugaw sa mga silingan.

Unsaon, nga duna man gyuy uban nga wa gyuy trabaho nga buntag pa ganing sayo, tua nagsing-al na, ug pakusgan ra ba gyud pag-ayo ang volume sa ilang mga sound system.

Nagtuo tingali sila nga ang ilang mga silingan giganahan nga naminaw sa ilang tingog. Dunay uban nga kon may silingan sila nga mokanta, iya gyud dayon nga kompetensyahan.

Unya, aron tingali sila gyud ang mapaminaw, pakusgan nila pag-ayo ang volume sa sound system. Resulta, alingisig kaayo nga maglibog ka na kon hain sa mga nagkanta ang imong pamation.

Karon, diri sa among lugar, nindot na kaayo kay mingaw. Ang madungog nako karon mao na lang ang mga awit sa kalanggaman ug ang panagsa nga tuktugaok sa mga manok.

Sigurado ko nga ang mga bata nga nagpahigayon og online classes wa na madisturbo. Salamat kaayo Cebu City Mayor Edgar Labella sa imong kamandoan.

* * *

Magpasalamat ko nga mora’g anam-anam na nga nasulbad ang kanihit sa tubig sa ubang mga dapit dinhi sa siyudad sa Sugbo nga kaniadto nag-antos sab sa way agas sa tubig sa ilang mga gripo.

Ang resulta niini, kay dili na man sila kinahanglan nga hatdan og tubig kadtong mga nagpuyo sa lupa nga dapit sa siyudad, ang MCWD makahatud na gyud kanunay og tubig diri sa mga “upland areas” nga maoy di gyud maabot sa tubig.

Unahon nako pagpasalamat ang chairman sa Board of Directors sa MCWD ug iyang mga sakop, ang general manager, unya si Engr. Michael Diola, ug ang mga driver sa ilang delivery truck, sama ni bai Abing, nga di malimot sa ilang obligasyon kanamo.

Kami diri sa mga “upland areas” naanad na nga kapin tuig na’ng way agas ang among mga gripo gikan sa MCWD, gawas lang kon mo-inject sila sa among sub-out.

Akong klarohon nga ang ihatud namo nga tubig sa MCWD, bayaran gihapon namo kay moagi man kini sa among meter, dili sama sa uban nga isulod ra derikta sa mga baril daplin sa karsada, nga way bayad ang uban.