EDITORYAL - Komusta ang depressed areas?

Di na ikahibulong nga sagad sa mga napositibo sa  COVID-19 nga naa karon sa mga isolation facilities, dili lang sa Cebu City kondili sa uban sab nga  lugar gikan sa mga kabus nga komunidad.

Base sa tamdanan nga giumol sa Inter-Agency Task Force for the Management of Emerging Diseases o IATF Resolution No. 75 exempted lamang kaddtong mga pasyenteng adunay kompletong kahimanan o lawak diha sa ilang panimalay.

Bisan gani kadtong mga masakitong senior citizen, mga menor de edad, mga tawong adunay gihambing balatian, mga mabdos, PWDss, kadtong dili mabuhi kun way moatiman ug mga immunocompromised patients mahimong ma-exempt apan mag-agad sa desisyon sa mga health officials.

Ang mga local health officers mahimong mo-exempt kanila nga dad-on sa isolation facilities aron sa balay nalang mag-quarantine ang napositibo bisan sila nalakip sa mga vulnerable sector sama sa gihisgutan sa ibabaw.

Apan mahitabo lang kini kun pasado sila sa “Guidelines on Local Isolation and General Treatment Areas for COVID-19 cases (LIGTAS COVID) and the Community-based Management of Mild COVID-19 Cases. Ang  rekisitos niini, kinahanglang duna silay saktong pasilidad ug mga gamit sa balay nga magamit sa pasyente ug di kinahanglan ma-expose ang ubang sakop sa banay. Apan kinsa man sa komunidad ang duna niini? Kadto ra gyung arang-arangan og balay. Apan sa mga nagpuyo sa barong-barong?

Karon ang pangutana giunsa man pag-monitor og maayo kining mga namuyo sa depressed areas sa mga barangay? Nga kasagaran raba bisan duna nay gipamati sa lawas di gyud moangkon kay nabalaka nga maundang ilang panginabuhian ug kahasol.

Sayon ra pagsubay kining uban, apan lisud bisan pag-monitor sa mga naa sa depressed areas tungod sa maong rason. Aning dapit kinahanglang gahinan sab og atensyon tungod kay kining pagtakod-takod sa sakit way pilion kun kinsa ang taptan. Apan ang mga kabus maoy dako og problemahon kun silay matakdan.