Kang Gwen ang pagpanalipod
JAV BANATI - Javier Yntig Tapulado (Banat) - September 11, 2020 - 12:00am

Unsay bation sa usa ka inahan kon may kabahin sa balwarte sa iyang panimalay ang gihilabtan, giguba ug gikuha pa gayod sa mga tawo nga wala mananghid kaniya?

Unsay itawag kanilang mihakot og mga butang sulod sa poder nga wala masayod ang tag-iya?

Mao kini ang kontrobersiyang nahitabo sa lungsod sa Alcoy, Cebu, diin giguba ang bukid ug nangubkob og dolomite ang mga higanteng makinariyas aron himoon kining puting bas (white sand) nga gamiton sa pagpaguwapa sa padayong giretokeng panagway sa Manila Bay.

Ang proyekto sa gobiyerno sa pagpatahom sa mga dapit sa Pilipinas, sama sa Manila Bay, maanindot baya. Kana, kon walay laing dapit ang mahilabtan, mahasol ug mao na pod hinuoy maggusbat, diin, ang bukid maupaw ug kalanggaman mahanaw.

Nananghid ba ni Cebu Governor Gwen Garcia ang Philippine Mining Service Corporation (PMSC) ug Dolomite Mining Corporation (DMC) sa wala pa nila sugdi ang pagpangubkob?

Si Bokal John Ismael Borgonia, Head sa Environment and Natural Resources Committee, miklaro nga wala gyoy klarong pakighimamat ang nahitabo tali sa mga lokal nga kagamhanan ug sa nanagdumala sa maong proyekto. Pastilan, no?

Ang Mines and Geosciences Bureau-7 sa DENR-7 namahayag nga ubos sa balaod, mahimong moisyu silag permit, labi nag maghisgot og mga dagkong quarry projects.

Gani, nakaisyu na man silag ore transport permit ngadto sa PMSC paghakot sa mga dolomite. Mao ba? Nahisubay pa ba sa hustong linya ang ilang gibuhat?

Ang permit to transport deperensiya baya sa permit to quarry for dolomite? Ikaduha, puwede ra ba diay manguhag butang sulod sa balwarte o balay ang usa ka ahensiya nga dili mananghid sa tag-iya, o nagdumala sa maong balwarte? Hain na ba ang sagradong respeto nga dapat batonan sa matag mangangalagad?

Busa, husto gyod kaayo ang pagpahunong ni Gob. Gwen sa nahisgotang mining companies, sa pagpangubkob og dolomite sa Alcoy.  Kay imbes moagig punoan, mideretso lag panguhit og mga bunga nga wala mananghid kaniya. Usa ka daotang taras kining gipakita sa MGB nga angay pakgangon.

Isip usa ka kugihan, mabinantayon ug mapinanggaong inahan sa tibuok lalawigan sa Sugbo, gipaningkamotan ni Gwen ang pagpanalipod sa katawhan lakip na sa kalikopan.

Gob, kanimo, ako saludo!

GWEN GARCIA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with