Tabang sa turismo

Ambot pa nganong daghan ang nag-alburoto batok sa pag-abuno karon og ‘white sand’ nga kabahin sa improvement sa Manila Bay didto sa kaulohan nga gipahigayon sa Department of Environment and Natural Resources (DENR).

Kini ilabina nga adunay mga nagduda nga ilegal ang pagpangubkob sa dolomite gikan sa ubang lugar sa nasud alang sa artificial nga white sand beach sa Manila Bay. Nahibaloan nga gikan dinhi sa Sugbo ang ubang dolomite nga gigamit didto.

Usa sa rason sa mga misupak niining maong proyekto mao ang pagkawalay hinungdan kuno niini. Matud nila, useless kuno nga magbutang pa og white sand tungod kay dili man usab angay nga kaligoan ang Manila Bay tungod sa ka hugay niini.

Usa pa, nag-usik-usik lamang kuno ang kagamhanan og salapi sa katawhan. Tungod kay mas angay pa unta nga gigamit ang dakong pondo alang sa Manila Bay ngadto sa kampanya batok sa coronavirus disease nga mihasi karon sa nasud.

Mitumaw usab ang laing kontrobersiya kabahin sa dolomite nga gikubkob gikan sa nagkalainlaing dapit sa nasud aron itabon didto sa Manila Bay. Dinhi sa Sugbo, naningangha na lamang kita sa taho nga gikan didto sa south ang maong dolomite.

Gani misalga ang Hunta Probinsiyal sa maong isyu ug giingon nga mohimo og inbestigasyon niini. Apan misibog kini sa dihang gipamatud-an sa Mines and Geosciences Bureau sa DENR nga walay trampas ang pagkuha sa maong dolomite gikan sa Sugbo.

Hinuon makapangagho usab kita nga magsud-ong nga sulod sa nanglabay’ng panahon, wala gayud maatiman ang Manila Bay, ang usa sa labing nindot nga atraksiyon sa kaulohan diin imong makita ang nindot nga sunset. Sa kadaghan sa mga nangaging administrasyon, wala gyuy nakahunahuna paglimpiyo ug pagpaanindot sa Manila Bay. Tungod sa ka baho niini gumikan sa nagkatag nga mga basura, daghang turista ang magyam-id nga mobisita niini.

Apan karon, na-transform na ang Manila Bay ug inanay na nga mibalik ang mga turista. Kini salamat sa dakong kampanya sa administrasyon ni Duterte paghinlo ug pag-improve sa mga baybayon sa nasud nga hagbay ra nga napasagdan.

Angay lamang hinuon nga masustiner ang dakong kausaban sa Manila Bay ug ubang tourists destinations nga gipaanindot karon sa environment department. Kini tungod kay dako kini nga tabang sa industriya sa turismo sa nasud.