Dili apil ang mga traditional PUJs sa laraw sa LTFRB nga tugotan na ang mga public utility vehicles gikan sa ubang kalungsoran nga makasulod na sa Cebu City karon nga na-MGCQ na ang dakbayan. Tun-an pa sa LTFRB ang nahimutangan sa mga establisemento aron matun-an usab kuno nila ang mga rota nga ablihan. Daw pagarpar ra ang gipamulong sa LTFRB. Bisan gani mga bata nasayod man kon asa ang mga dagkong tindahan. Duha ra usab ang dalan gikan sa probinsya: ang N. Bacalso Avenue sa South ug ang MJ Cuenco Avenue-North Road sa Norte. Matud pa sa Intsik, “Dakhan suti, dakhan sayop (Daghang Sulti, Daghang Sayop)”. Syaraaap!
Multi-tasking ang seniors
Matud pa sa usa ka doktor, ang padayon nga pagpatuman sa mga quarantine restrictions ngadto sa mga senior citizens, nakaapekto na sa ilang pisikal ug mental nga panglawas. Dugay na kining gireklamo sa atong mga senior citizen labi na kadtong mga piskay pa ug aduna pa’y trabaho nga gikalingawan. May punto ang pagreklamo sa mga edaran. Bisan sa ilang pangedaron, kaya pa kuno nila ang mag-multi-tasking. Mahimo man nila’ng dunganon ang pagkatawa, pag-ubo, pagpanghatsing ug pagpangihi sa usa ka higayon. Hala no!
Markahan kay giilogan
Giugbokan sa taga-Northern Luzon Command sa AFP og mga markers ang 11 ka isla sa Northern Luzon isip kabahin sa kalihokan pagseguro sa teritoryo sa Pilipinas Daghang mga langyaw ang mitaak sa maong mga isla ug ang pag-ugbok sa mga marker dili makaseguro nga dili kini angkonon sa uban. Nakapahinumdum kanako sa panaglalis sa duha ka pasahero sa barko nga nag-ilog sa teheras kay parehas sila’g cot number. Agi ug sulbad, gialsa sa usa ka pasahero ang teheras dayon ingon, “Na hala, imo na ang cot number, ako-a ni’ng teheras”. Madahaaan!
Way focus ang DTI
Wala pa makadesider ang DTI kon aduna ba’y suggested retail price (SRP) nga ipatuman sa mga gadgets sama sa laptop kay padayon pa’ng gitun-an ang maong lakang. Dugay na nga gianunsyo sa DepEd nga gadgets na ang gamiton sa pagbukas sa klase. Angay unta nga giuna kini pag-atiman sa DTI kon matinud-anon pa ang ilang panerbisyo. Tungod sa demand, nahurot na lang kahalin ang mga laptop ubos sa pagpatuyang sa presyo sa mga tindahan apan walay DTI nga naghikutar. Matud pa sa yungit nakong silingan, “Way ‘Kupos’ (Focus) ang DTI”. Fezteleern!
Yutang natawhan for sale
Buot paimbestigahan ni Senadora Risa Hontiveros ang posibilidad nga adunay mga Pinoy nga nalambigit sa pagbuhat sa China sa mga artificial nga isla ug ubang military installations sa West Philippines Sea, pinaagi sa pagsupply sa aggregates nga giabuno sa reclamation projects. Ang atong kasaysayan nagtug-an nga daghang mga Pinoy ang nagbudhi sa nasud. Ang pagpuhag sa kabukiran aron ang yuta, balas ug mga graba ibaligya ngadto sa China, sama ra nga gibaligya sa mga mabudhion ang atong yutang natawhan. Pagkalampingasan!