Ayaw palabi’g kabuotan
RENBOR PATROL - Rene U. Borromeo (Banat) - August 11, 2020 - 12:00am

Nalipay ko kay bisan og “busy” si Cebu City Mayor Edgar Labella apan gitawgan ko niya niadtong Biyernes sa gabii, ug daghan mi og giestoryahan nga mga isyu nga naglambigit sa mga gimbuhaton para sa katawhan sa siyudad.

Pero, akong klarohon ha nga dili ko opisyal ug dili sab ko kawani sa Dakbayan sa Sugbo. Nag-send man gud ang mayor nako og message sa akong Messenger, mao nga akong giingnan nga gusto unta ko nga makig-estorya niya.

Ang tinuod, magpanagana gyud ko pagtawag ni Mayor Labella kay nakasabot man gud ko nga pwerteng busiha niya. Kon tawgon nako unya dili ko niya tubagon, basin mahiubos lang unya ko.

Pero, hapit na kadto ala una sa kaadlawon ug nagmata pa ang mayor.

Giingnan ko niya nga ang rason nga wa pa siya matulog kay gibasa niya ang mga usa ka libo ka text messages nga iyang nadawat.

Nakaingon ko nga dili gyud ko magmayor kay pwerteng kapoya, daghang trabaho ug kita pa ang sawayon kon dili magkadimao ang pagdumala sa dapit nga iyang gidumala.

Aw, bisan pa man gani og maayo ang pagkadumala, dili gyud kalikayan nga dunay mga tawo nga kaatbang nimo sa politika nga tuyoon ka gyud sa pagdaut.

Bitaw, nasabtan nako nga maayo og tumong si Mayor Labella, apan ang nakaapan kay ang uban niyang kamandoan dili man tumanon sa iyang mga sinaligan.

Usahay gud makaingon ko nga unsa kaha’y tumong niining ubang sinaligan sa mayor nga mora man og tuyoon nila nga dili matuman ang iyang mga mando aron sawayon kini sa katawhan.

Tan-aw nako morag naghinubra ang kabuotan ni Mayor Labella nga bisan og nasayod siya nga ang iyang mga sinaligan wa motuman sa iyang mando kanila, maikog siya nga mopitol.

Ang akong ikatambag sa mayor mao nga dili siya magpanuko sa pagpahamtang og silot, o kaha iyang taktakon ang mga tawo nga dili motuman sa iyang mando.

Ang mga tawo nga wa motuman sa iyang kamandoan, igo ra gyud nga magkatawa ug manghunaw kon mahitabo nga makasinati siya og mga palpak sa pagdumala sa siyudad.

Tambag nako ni Mayor Labella nga menus-menosan niya ang iyang naghinubra kabuotan. May nagsulti nako nga may mga higayon nga si Mayor Labella mangasaba sa iyang mga sakop, apan inigkataudtaod, iya ra usab kini nga hapohapon.

Mora bitaw sa usa ka buotan nga amahan sa pamilya. Pero, pahinumdoman nako ang higala ko nga mayor nga lahi ang pagdumala sa pamilya ug ang pagdumala sa siyudad.

Karon, gimandoan na ni Mayor Labella ang iyang mga sakop nga ipahatag na ang cash assistance sa mga PWD, apan ambot kanus-a kaha kini nila ipatuman.

EDGAR LABELLA
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with