Nagkaubos
Atong hangpon kining maayong balita mahitungod sa nagkaubos nga mga kaso sa coronavirus disease o COVID-19 nga natala dinhi sa dakbayan sa Sugbo ug sa kinatibuk-an nga probinsiya sa nakalabay nga mga adlaw.
Gani basi sa ulahing rekord sa Department of Health, dili na kuno ang siyudad sa Sugbo ang epicenter sa COVID-19 sa Pilipinas kondili ang Quezon City ug ang kinatibuk-an nga National Capital Region nga gibalik karon sa modified enhanced community quarantine.
Sa nakalabay nga mga adlaw, grabe ang pagtidlom sa mga kaso sa coronavirus disease dinhi sa dakbayan sa Sugbo. Gani, sukad sa niaging Miyerkules, ubos sa 50 ka kaso sa maong balatian ang matala niini matag adlaw.
Dili ikalimod nga resulta kini sa higpit nga pagpatuman sa otoridad sa mga lagda sa quarantine sa dihang nailalum pa ang dakbayan sa MECQ sulod sa duha ka semana ug laing tunga sa bulan nga enhanced community quarantine.
Hinuon, taliwala niining nagkaubos nga mga bag-ong kaso sa COVID-19 karon, dili usab maayong balita kining pagsaka sa mga kaso sa mga namatay sa coronavirus disease ning siyudad ug sa lalawigan.
Siguro wala na makaagwanta ang ilang mga lawas sa pagkuyanap sa maong virus ug nga gilupig gayud ang ilang immune system. Hinuon, dili tanan makasugakod sa kaisog sa maong balatian nga mihasi sa kalibotan karon.
Sa laing bahin, niining general community quarantine, milugak na gamay ang lagda ug makagawas na ang katawhan kun adunay pagtugot usab sa ilang quarantine pass. Gani mitugot na si Mayor Edgardo Labella nga mapun-an ang gidaghanon sa manambong sa mga kalihokan sa simbahan.
Hinaut nga magpadayon ang maayong performance sa dakbayan ug kinatibuk-ang Sugbo batok niining seryoso ug makamatay nga balatian. Apan matuman lamang kana kon padayong motuman ang tanan sa lagda.
- Latest