Usa ka buwan gikan karon buksan na ang klase sa mga pampublikong tunghaan apan andam na ba gyud kaha ang mga tunghaan sa pagsagop sa bag-ong normal?
Nibisita ko sa mga bukirang barangay kagahapong adlawa diin gisuta nako ang sitwasyon sa mga tinun-an nga nanimuyo didto. Sa public school sa Barangay Buot naabtan nako ang mga magtutudlo nga nagpahigayon og webinar sa ilang mga gimbuhaton inig abli na sa klase ug sa ipatuman nila nga mga estratihiya alang sa new normal nga klase.
Matud sa mga magtutudlo nga 99% nga andam na sila kay wala may kapilian kon dili mag-andam gyud.
Taliwala pa man niini, nakita nako ang kahingawa nila ngadto sa ilang mga tinun-an sanglit halos tanan dili man gyud makasugakod ilabi na sa paggamit og teknolohiya.
Hinay o wala gyud gani internet connection ang dapit, kon duna man pangitaon kaayo.
Maayo nalang kay naay gamayng signal sa ilang wi-fi didto sa ilang eskwelahan kay sa ilang mga balay wala gyud.
Tungod niini, ang mga ginikanan ug ang mga magtutudlo nagkasabot nga mopili sa modular type of learning.
Pero gusto nila kong tugotan lang nga dunay physical presence ang mga tinun-an ilabi na sa mga gagmayng bata pero ubanan sa mga ginikanan.
Kini aron matutokan ang ilang pagkat-on sa leksyon apan limitado lang ang makasulod sa classroom ug i-schedule lang pud ang uban sa sunod nga adlaw.
Kining pamaagiha mahimo man apan mag-agad gihapon kini sa kadagkoan sa DepEd kon matugotan ba kay ang Cebu City anaa pa man sa hugot nga quarantine status.
Wala hinuoy kaso sa COVID-19 sa baranggay Buot gikinahanglan sila nga mo-comply kon unsa man ang ipatuman sa kadagkoan. Kong ugaling ipadala lang ang mga materyalis sa balay ug ang mga ginikanan lang ang motudlo, pwede man kong ang mga ginikanan dunay katakos nga motudlo sa mga bata. Apan sa realidad lisod kay matod sa mga ginikanan nga akong nahinabi nga dili sila makatudlo sa ilang mga anak kay kasagaran kanila maglisod man gani og sabot sa ininglis ug samot na sa math, gani naa pay maglisod sa pagbasa.
Gawas pa nanarbaho sila sa ilang umahan busa dili sila makatutok tibuok higayon kay gikinahanglan man pud sila nga manginabuhi. Ugaling naay gamay nga signal, ang problema kay dili maka-afford sila sa pagpa-load sa cellphone nga outdated.
Kini ang realidad nga sakit kong ipamugos gyud ang klase sa sunod buwan.