Doing ug being

Daw malisod alang nako nga magpunay lang og urong. Dili ko ganahan nga naa lang ko kanunay sa akong kwarto o dili ba kaha anaa lang gyud ko kanunay sa kumbento. Buot nako nga molihok, molakaw ug moduaw sa akong mga parokyano diha sa ilang tagsa tagsa ka mga kapilya apan tungod lagi ning COVID-19 nahimong nausab gyud ang tanan.

Wala kaayoy daghang kisaw ug nia akong gipaningkamotan nga pakigbatokan ang kamingaw. Hinuon salamat sa Dios kay bisan ning maong kamingaw anaa man gihapon ang kalinaw.

Nahimong menos tuod ang akong paglatagaw ngadto sa dakbayan ug gani mahiuli naman dinhi sa parokya sa Madridejos, Alegria sa matag kaadlawon nga matugnaw.

Sa panahon sa COVID-19 ang unang semana sa pakigharong puno sa kadasig ug kainit. Solicit dinhi ug solicit didto kun maghisgot ta og mga hinabang nga bugas alang sa atong mga parokyano.

Prosesyon dinhi, prosesyon didto sa panghinaut nga motabang ang mga santos aron sa ingon mahunong na gyud kining maong dakong suliran nga gimugna lamang sa mga tawong hakog sa gahum ug pasidungog. Mga tawo nga nagtuo nga mas labaw pa sila kaysa sa Dios nga maoy tag-iya ning tanan. Gani buot man silang magpasimba. Ambot asa gikuha nila kining maong hunahunaa?

Doing ug Being. Ang Doing mao na ang paglihok o aksiyon nga nahitabo agig resulta sa imong Being. Nga sa ato pa ang atong Being mao nga kita tawo ug ang atong Doing mao ang mga buhat nga pinasikad sa kinaiya sa usa ka tawo ug naglambigit kini sa gitawag natong rational.

Sa ato pa ang tanang pagahimoon nato isip mga tawo kinahanglang pinasikad gyud sa hustong rason ug desisyon nga gipamalandongan ug labaw sa tanan giampoan.

Ning panahon sa pandemiya matag usa nato naningkamot nga mamahimong mapuslanon alang sa mga nanginahanglan. Matag usa nato nahimong mas madasigon sa gihapon unta nga mohatag og paglaum (Doing) kay kita mga Kristiyanos man (Being).

Hinaut  nga ang gugma kanunay maoy mopatigbabaw ug dili ang kahakog panlupig ug pagyatak sa katungod sa kadaghanan aron mas palabihon ang eitismong panglantaw sa pipila nga human makapahimulos padayong mi bully sa kinabag-an pinaagi sa paghimo og mga lakang agig pagkontrol sa mga tawo ginamit ang kahimtang sa pandemiya.