Swabe
LINTUNGANAY - Fred P. Languido (Banat) - July 23, 2020 - 12:00am

Ngano bang daw sa labihan man kalisang sa kagamhanan sa dakbayan sa Sugbo dihang nagsugod pagpanguhong ang mga tarpaulin diha sa kabarangayan nga nagpahinumdom sa katawhan sa kanunay'ng pagtamod sa mga health protocols aron malikayan ang makamatay nga sakit nga COVID-19?

Ang dagko nga mga tarpaulins gibitay diha sa mga skywalks. Duna ni mga hulagway unsay angayang buhaton sa katawhan sama sa pagpanghunaw kanunay ug pagsul-ob og face mask aron malikay sa sakit.

Nalakip usab ang mga pulong "Tuman aron tanan OK" ug ang pangalan sa kapitan sa barangay diin nahimutang ang maong mga tarpaulins.

Kun imong tan-awon wala gyuy dautan sa gihimo sa mga kapitan nga kaalyado sa niini ug angayan pa gani nga magpasalamat ang dakbayan sa dakong tabang niini sa kampanya batok sa COVID-19.

Apan nganong gipatangtang sa City Hall ang maong mga tarpaulins? Sigun ni Raquel Arce, pangulo sa PROBE, nga maoy nanangtang sa mga tarpaulins, mando ni City Administrator Floro Casas ang paghimo niini.

Wala kunoy permit gikan sa dakbayan ang pagpanaud niini. Kinahanglan ba gud nga mangayo og permit ang barangay sa information campaign nga ilang gibuhat diha sa ilang kaugalingon nga mga nataran?

Tataw nga gigamit lang nga lansis sa dakbayan ang permit. Ang tinuod nga rason sa pagpatangtang sa maong mga tarpaulins mao ang politika.

Ang mga karaang tigpaniid sa politika nasayod sa swabe nga mensahe nga dala sa maong mga tarpaulins.

Ang pulong "OK" maoy nakapalisang ug nakapa-insecure sa pamunoan sa City Hall.

Kini tungod kay sa politika nagpasabot ni og "Osmeña Kami."

Kining maong slogan sa politika gigamit sa mga Osmeña sulod sa taas na nga katuigan sukad pa kaniadtong dekada 50 panahon sa amahan ni kanhi mayor Tomas Osmeña nga si Serging.

Mahimong dunay swabeng mensahe sa politika ang mga tarpaulins apan mas dako og importante ang mensahe niini sa pagbatok sa COVID-19.

Mas importante ba diay alang sa mga opisyal sa City Hall ang personal nilang insecurities kay sa kaayohan sa katawhan?

Hinaut nga puy-an ni Mayor Edgar Labella ang matagpulong nga iyang luwatan sama sa kanunay niyang panawagan nga ihiklin ang politika.

Ang iyang kadaugan sa miaging eleksiyon batok ni Osmeña pruweba nga dili mosaler ang OK sa mga Sugboanon. Performance maoy labing epektibo nga slogan sa kampanya sa politika.

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with