Ang labing negatibo karong panahona mao man ang pulong positibo. Mao tingali nga wa na kaayoy mo-post sa Facebook og “Not Feeling Well” kay mag-ayo og ma-isolate ka dayon gikan sa kadaghanan.
Sa laktod dili tanang positive nindot paminawon ug dili tanang negative makadaut. Mao nga kun moingon sila nimo nga positibo ka sa Corona unsaon na lang gyud nimo sa?
Walay exempted nato. Ang tanan suspetsado. Mga PUM kita kun mga persons under monitoring gumikan ning maong pandemiya.
Matag usa dunay dakong kaakohan nga maningkamot nga panalipdan ang kaugalingon gikan ning maong makamatay nga virus gani dunay sugyot nga ang mga tawo panahon sa pagsaulog sa misa ang dili na lang pakantahon kondili mentally moapil sa pagkanta kay basin pinaagi sa pagbuka sa baba nahimong mas mokuyanap pa ang virus.
Gitawag kini og aerosolization. Sa laktod, dunay dakong posibilidad nga mobalik kita sa karaan diin ang Santos nga Misa nahimong saulogon sa mas hilom ug dinalikyat nga paagi kay lagi gisaulog man sa mga Catacombs. Negatibo ba kini o positibo?
Sa laing bahin, unsay atong kinaiyang gipakita ngadto sa tawo nga nasakpang positibo sa coronavirus? Ang uban gi-discriminate daw mga tawong mga public sinners nga angayang i-outcast gikan sa katilingban diin sila sakop. Positibo ba nga sa ngalan sa seguridad kita usahay nahimong mean sa uban?
Ambot lang kaha. Hinuon dili sab ta makabasol kun ingon ini ang reaksiyon sa kadaghanan ngadto sa mga COVID-19 positive. Kini tungod kay anaa sa matag usa kanato ang kahadlok.
Kahadlok nga sa yuta maluyong. Kahadlok nga mag inusara. Kahadlok nga mahitumpawak sa makamatay nga ginhawa ni Corona. Bisan gani ang salapi dili man makaluwas kanato kun ato na gyud turno nga moatubang sa sanggot ni kamatayon.
Nahinumdom ko ni Monsenyor Tining Diotay nga nitaliwan dili pa lang dugay.
Samtang nagkita mi sa SM kaniadto ug nasayud siya sa akong kahimtang sa dihang nadestino ko sa bag-ong parokya didto sa amihanan, ang Parokya ni San Pedro Calungsod sa Mohon Sogod, Cebu. Iyang gipikpik ang akong abaga dungan ang pag-ingon. “Dong, balay sa Ginoo ang imong gitukod, mahuman man gani ang balay sa tawo ang sa Ginoo pa kaha? Mao nga ayaw kabalaka salig lang!”
Nahimong dinalian man tuod ang iyang lubong apan pabiling inanay nga isilsil sa akong kasingkasing ug hunahuna ang maong mabulokong panagtagbo. Monsenyor Panhulay nga malinawon! Sugaton ka unta sa Koro sa mga Anghel diin si Lazaro dili na Kabus!”