Ang negosyo ug ang coronavirus

Of course na-affected kitang tanan niining pagkaylap sa makapatay nga kagaw, ang coronavirus. Apan, nauna sa atong mga pagtagad ug kabalaka mao ang mga kabus ... ug lately ang mga middle class ug kadtong nawad-an sa mga trabaho ug panginabuhi.

Ug karon, nasinati na sa mga magpapatigayon ang epekto niini ngadto sa negosyo. Gumikan niini, ang mga negosyante nanghinaut nga makabukas na sila sa ilang mga patigayon.

Ang kadagkoan sa pundok sa mga negosyante ning dakbayan nakigtagbo ni Mayor Edgar Labella, naglakip sa Cebu Chamber of Commerce and Industry (CCCI); Philippine Retailers Association Cebu Chapter; University of San Carlos School of Business; Hotel, Resort and Restaurant Association of Cebu Inc.; ug ang Philippine Institute of Certified Public Accountant.

Gituki sa tigum ang concerns sa business sector sa higayon nga ma-lifted ang enhanced community quarantine (ECQ) sa dakbayan, sama sa availability sa testing kits alang sa mga empleyado nga mamalik na unya sa trabaho.

Ang presidente sa CCCI, si Felix Taguiam namahayag nga gikinahanglan gayud nga mahibalik na ang operation sa mga negosyante sa dakbayan, ilabina ang atong pagpamatigayon uban sa Metro Manila. “The prolonged ECQ  has hurt some businesses,” dugang ni Taguiam.

Gawas nga wala nay income ang natak-opan nga mga patigayon, ato usab ma-imagine ang kalisod nga karon gipas-an niadtong nawad-an sa trabaho. Unsaon na lang.

Ang dakbayan sa Sugbo maoy trading center sa Kabisay-an ug Mindanao. Matud pa, samtang bukas na ang Manila, “Cebu is still closed. As long as Cebu City remains closed, other businesses in the province will have a hard time operating as the main business hub in the island is the city,”dugang ni Taguiam.

Ug bahin niining mga testing kits, gihangyo nga unta ang dakbayan nay mogasto niini, ilabina sa mga gagmay ug medium nga mga patigayon. Asa man kuno sila’g igasto nga wala na man silay income sulod sa niaging pila ka bulan.

Akong tan-aw, kining gisugyot paglibkas sa ECQ, dili kini masayon ug madali. Atong ma-imagine ang magkadaghan na unya ang katawhan nga manggawas gikan sa mga panimalay, ug magkadaghan na usab ang mga sakyanan nga maghuot sa kadalanan.

Mas lisud na unya ang pag-manage  niini. Angay hunahunaon nga samtang na-modified ug o na-general na ang quanarantine, ania pa uban kanato ang coronavirus. Sa ato pa, gikinahanglan ang mas estrikto nga pagpatuman sa mga lagda nga ipasunod kanato sa kagamhanan.

Dugang niini, sa ato nang gibalikbalik dinhi, mas gikinahanglan ang pag-disiplina sa atong kagalingon, ug pagpahumok sa kagahi sa atong ulo. Mahimo kaha ni nato?

Usa sa gisugyot, kining giingon nga work from home, aron dili kinahanglan nga mo-report ngadto sa mga buhatan ang mga empleyado, o sa mga pabrika ang mga trabahador, niadtong matang sa trabaho nga mahimo sulod sa panimalay.

Apan, pila ra man ka matang sa trabaho nga mahimo sulod sa atong mga panimalay? Adunay nangomedya nga usa ka embalmer, unsaon kuno niya pagdala sa iyang trabaho ngadto sa ilang balay?

Alang kaniya, dili mo-work ang work-from-home sa matang sa iyang trabaho.

Kining sugyot paglibkas sa ECQ  sa atong dakbayan, nagkinahanglan kini’g dugang ug halawom nga pagtuon.