Wa diay matakdi pag-usab
Nahasol ang kalibotanong kahinangop sa pagtinabangay sa labing adunahang mga nasud ug higanteng mga kompaniya sa pagmugna og bakuna batok sa Covid-19 nga nakatakod na og dul-an sa 3.7 milyones ug nakapatay na og kapin sa 257,000 ka molupyo sa kapin 200 ka nasud.
Nahimut-okan ang kalibotanong kahigwaos sa mga pasalig nga may bakuna nang mahimo karong tuiga tungod sa nitumaw nga mga kaso sa mga naayo na sa sakit apan natakdan pagbalik sa kagaw. Kon di makamugna ang lawas og panagang human natapti sa tinuod nga kagaw, unsa may mahimo sa bakuna?
* * *
Ang South Korea nitaho og kapin sa gatos ka pasyente nga hingpit nang naayo sa Covid-19, nakagawas na gani ang kasagaran nila gikan sa tambalanan, apan dihang gikuhaan og lab-as nga swab samples nag-positibo pagbalik sa Covid-19.
Nakapatumaw ni sa kabalaka nga ang antibodies nga namugna sa immune system sa mga pasyente sa Covid-19 di paigo nga makahatag nila og immunity gikan sa sakit. Mohimo ning inutil sa bisan unsang bakuna nga mamugna ug mosangpot sa way kinutoban nga pagbalikbalik sa kalibotanong hulga sa umaabot nga katuigan.
* * *
Apan ang maayong balita gikan sa World Health Organization (WHO) mao nga ang labing bag-o nga mga pagtuon nagpakita nga ang naayo nga mga pasyente nag-positibo sa Covid-19 di tungod kay natakdan pag-usab sa kagaw kon dili tungod kay padayon pa silang nisalikway sa kabahin sa ilang baga nga nadaot.
Sa ato pa, wa sila masakit pag-usab. Hinunoa, padayon silang nagpahiuli sa kahimsog sa ilang panglawas pinaagi sa pagpalayas sa nangamatay nga cells sa baga nga maoy nakapa-positibo nila sa Covid-19.
* * *
Gipasabot ni Dr. Maria Van Kherkove, ang pangu nga infectious disease epidemiologist sa WHO, nga nagkinahanglan pa og dugang pagtuon kon ang naayo nga mga pasyente makatakod pa ba sa ubang mga tawo.
Matod ni Kherkove nga susihon pa sab kon igo ba ang antibodies nga namugna sa mga pasyente aron nga makaangkon og immunity batok sa sakit. Ug kon may immunity man, tun-an pa sab kon hangtod kanus-a ang panagang: Hangtod sa hangtod ba sama sa tipdas o pipila ba lang ka buwan o tuig sama sa ubang coronavirus.
* * *
- Latest
