Hangtod karon wala gihapon makasabot ang mga tawo sa buot ipasabot sa enhanced community quarantine. Tungod niini, gihimong lisensiya sa mga tawo ang quarantine pass nga gihatag kanila aron makapadayon sa ilang mga gimbuhaton sama sa wala pa gipakanaug ang enhanced community quarantine.
Ang labing sayon nga pulong sa pagsabot o hubad sa Iningles nga enhanced community quarantine mao ang pulong nga PAGPUYO o ayaw paggawas sa imong balay samtang anaa pa ang Coronavirus Disease 19 gawas lang kon mopalit ka og pagkaon, tambal ug mga pinakagikinahanglan sa tawo o pamilya.
Apan ang nahitabo daghan gihapon ang migawas sa ilang balay ug misupak sa patakaran nga gipakanaug sa gobyerno aron dili matakboyan sa makamatay nga virus.
Hasta ang mga tiguwang nga maoy pinakasentro sa ataki sa virus nagpakita pod sa ilang pagkabadlungon. Ina kay magpuyo sa balay molighot gyod ug molaag. Ina kay maghimo sa ilang kaugalingon nga sumbanan sa mga bata ug mga linghod na sa ilang pagsabot, nagpakita hinuon sa ilang kaugalingon nga dili maayong sumbanan sa kabataan. Mga dili sila maayong ehemplo. Nanghagit sila sa virus ug gusto nga magpatakod.
Wala makita sa mga nagpabadlong ang mga mosunod nga mahitabo nila kun matakdan. Una, kalisangan sila sa mga tawo, likayan ug posibleng dili dawaton sa mga tambalanan. Sama pananglit sa nahitabo sa 65-anyos didto sa kaulohan nga gibalibaran sa unom ka mga tambalanan diin siya gidala aron patambalan bisan wala pay klaro kun kini may COVID 19 ba hinungdan nga giuli na lamang siya sa iyang pamilya ug namatay.
Ikaduha, kun mamatay ang may COVID-19 nga pasyente dili pabilaran ang iyang patay nga lawas tungod kay ipasunog dayon kini o ipalubong nga wala man lang gani sakop sa iyang pamilya ang paduolon kun magkalisod.
Ang pait kun walay punerarya nga mokuha sa patay kun ang tagtungod dili makabayad sa bayranan sa pagpasunog sa ilang patay. Magpa-COVID-19 pa ba ka?