Gilawog sa tirong
LINTUNGANAY - Fred P. Languido (Banat) - April 9, 2020 - 12:00am

Dakong hagit alang sa lokal nga mga opisyal sa gobyerno unsaon pagpasabot ang publiko nga kuwang ug wala nila ibulsa ang dakong salapi nga gipahibawo sa nasudnong kagamhanan nga ipanghatag sa tanang apektado sa krisis nga mugna sa COVID-19.

Kini tungod kay wala magkadimao ang mensahe nga gihatag sa national government.

Mataghigayon nga moatubang si Presidente Rodrigo Duterte sa publiko pinaagi sa media, kanunay niyang isulti nga dunay kapin sa P200 bilyones nga pundo nga gigahin ang gobyerno alang sa social amelioration program pagtabang sa tanang pamilya.

Gidugangan pa ang kalibog sa mga politiko nga harab og publisidad sama ni House Speaker Alan Peter Cayetano.

Sa tinguha niyang mosakay sa panahon bisan way labot, nisamot og kalibog ang katawhan sa iyang pamahayag nga ang tanang household dunay madawat nga hinabang gikan sa gobyerno.

Apan kun ang DSWD, ang ahensiya nga gitugyanan pagpatuman sa programa, dili tanan makadawat sa cash assistance.

Kadtong lang mga pamilya nga beneficiary nang daan sa ilang programa sama sa 4Ps, mga senior citizens, single parent, mabdos, ug uban pa nga nalatid sa ilang guidelines.

Kini maoy naghatag og labad sa ulo sa lokal nga mga opisyal. Ang nadunggan sa publiko gikan sa pamahayag sa presidente ug ni Cayetano tanang pamilya apan sa lagda sa DSWD dili  tanan.

Unsaon man intawon pagpasabot sa mga kapitan, mayor, ug gobernador ang publiko niini? Ang mahitabo mao nga ang lokal nga mga opisyal maoy balikason sa katawhan ug pasanginlang gibulsa ang kwarta samtang ang mga nasudnong opisyal magkatawa nga manghunaw og responsibilidad.

Pananglitan dinhi sa dakbayan sa Sugbo, si Mayor Edgar Labella mitug-an nga P262 mil lang ang gigahin sa DSWD alang sa SAP beneficiaries.

Kwentaha kuno og unsaon man intawon pagkaigo sa maong kantidad? Sa tag P6 mil matag pamilya, 43 ra ka mga pamilya ang maabot sa maong kantidad.

Ug tingali mao ni rason nganong si Labella nanagana nang daan pinaagi sa pag-ingon nga iyang itugyan sa mga kapitan ang pagdumala niini.

Matud niya nga dili niya paapilon ang iyang Mayor's Information and Liaison Office (MILO) sa pagpanghatag sa SAP.

Lihay siyang daan tungod kay siguradong lamokon sila og reklamo kun way madugang sa kantidad nga gitagana sa DSWD.

Ang makaluluoy niini ang lokal nga mga opisyal nga daw sa gilawog sa tirong sa nasudnong kagamhanan.

TIRONG
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with