COVID-19 nakadaot, apan nakaayo

Ang pagtumaw sa Corona Virus Disease (Covid-19) sa hapit tanang dapit sa kalibutan, nakahatag og dakong kadaot sa ubay-ubay’ng katawhan, apan dili usab ikalimod nga ang epekto sa pagkuyanap maong sakit nakamugna og kaayohan.

Tungod sa Covid-19, daghan ang nawad-an og trabaho, mga negosyante nakasinati og alkanse sa ilang negosyo kay naundang man ang mga pamatigayon. Daghang kinabuhi ang nakalas tungod sa Covid-19.

Sa laktud, dakong kadaot ang nahiaguman sa katawhan. Apan luyo niining tanan, wa lang makamatikod ang katawhan nga ang pagtumaw sa Covid-1 nakahatag usab og kaayohan.

Dihang misugod na pagkuyanap ang Covid-19 dinhi sa Sugbo ug sa ubang dapit sa nasud, gimando sa mga opisyal sa kagamhanan nga i-regulate na ang pagsuroy-suroy ug kadto na lang dunay mga passes ang tugotan nga makasuroy.

Tuod, kadaghanan sa mga tawo naa na lang nag-estar sa ilang kabalayan. Dunay uban nga may pagka ligoy, aw nagsige lang og ligid, ang uban nagsige og duwa ug gamit sa ilang mga cellphones.

Apan ang uban nga dunay panglantaw ug dili gusto nga mausik ang ilang oras, gigamit ang ilang oras sa pag-estar sa panimalay pinaagi sa pagpanglimpyo, paghimo og garden nga katamnan og mga utanon ug uban pa.

Ang uban nakighugoy-hugoy sa ilang mga sakop sa pamilya kay atol sa wala pa gimando ang Enhanced Community Quarantine (ECQ), halos wa sila’y panahon sa ilang pamilya tungod kay nakatutok ra sila sa trabaho.

* * *

Akong pasalamatan ang mga sakop sa Mayor’s Information & Liaison Office (MILO) sa Barangay Apas nga nihatag na gyud sila og mga bugas ngadto sa mga lumolupyo sa Sitio Fatima nga sakop sa ilang barangay.

Pwerteng lipaya tawon sa akong mga silingan, ilabi na ang pamilya sa mga buta nga dugay na kaayong nagpaabot sa maong hinabang nga tag 25 ka kilong bugas gikan sa kagamhanan sa siyudad sa Sugbo.

Ako sila nga gipasabot nga tungod sa kadako sa teritoryo sa Barangay Apas, mao kini ang rason ngano nga ang mga sakop sa MILO dugay nga nakaabot sa among dapit og nanghatag og hinabang.

Pero ang nindot gyud unta kun ang mga sakop sa MILO ug ang mga opisyal sa barangay, nagtinabangay unta sa pagpanghatag sa 1,000 ka sakong bugas humay gikan sa City Hall.

Nalipay sab ang katawhan kay ang kagamhanan sa Barangay Apas nga ubos ni Kapitan Virgil “Jingjing” Cabigon nanghatag usab og tag tulo ka kilong bugas ug mga delatang pagkaon, ug noodles. Mag-ampo kita nga dili na unta mokuyanap ang Covid-19 aron nga hunongon na ang pagdeklarar og ECQ dinhi sa nasud.