Pabadlong
LINTUNGANAY - Fred Languido (Banat) - March 26, 2020 - 12:00am

Samtang nangugat na silang Cebu Governor Gwendolyn Garcia ug Cebu City Mayor Edgardo Labella pagpatuman sa curfew aron kapugngan ang pagkuyanap sa coronavirus disease (COVID-19), pipila sa mga kapitan nga mao untay angayang mangulo sa pagpatuman sa curfew ug uban pa nga mga kamanduan gikan sa mayor ug gobernador mao na hinuoy nag-ulo sa pagpabadlong.

Kabahin sa kutay sa mga executive orders nga giluwatan sa gobernador aron malikayan ang sakit mao ang pagdili sa panagtapok, apil na niini ang tigbakay ug ubang matang sa sugal.

Apan ambot unsay nasud sa utok ni Kapitan Ruel Cuevas sa Barangay Kabatbatan sa Dumanjug nga nagpasiugda man hinuon og tari atol sa iyang adlaw’ng natawhan.

Prisohan hinuon maoy gidangatan sa kapitan human siya gidakop sa kapolisan.

Dinhi sa dakbayan sa Sugbo nakuhaan pud og video ang kapitan sa Barangay Kalunasan nga si Nunilon Monares nga nag-inom gawas sa pinuy-anan sa iyang uyab didto sa Martinez Compound sa Barangay Kamputhaw.

Inay nga siyay mangulo sa pagpatuman sa curfew didto sa iyang barangay, gibiyaan niya ang iyang responsibilidad og nagkig-inom hinuon didto sa laing barangay.

Nahitabo ni taliwa sa gipatuman nga liquor ban ug curfew dinhi sa dakbayan.

Basi video nga mikatap diha sa social media makita nga buot untang dakpon sa mga nagpatrolya nga sakop sa Abellana Police Station ug mga tanod ug opisyal sa Kamputhaw ang grupo ni Monares.

Apan dali nga nakapanawag og tabang ang kapitan sa usa ka “major”.

Tungod niini wala gyud madala si kapitan sa mga polis. Si Monares nga miatubang sa media duha ka adlaw human sa hitabo, nanghimakak nga milapas siya sa liquor ban ug curfew.

Gawas sa mikatap nga video nga nagpakita sa kinahon nga ilimnon wala nay laing ebidensiya pagmatuod nga nilapas sa liquor ban ang kapitan.

Unsaon nga wala man dakpa og dayon sa mga mirespondi nga polis aron unta mapaubos sa liquor test.

Karon piligro pa nga ang mga ultimong polis nga mirespondi ang maapiki tungod kay mag-atubang sila og imbistigasyon.

Apan hangyo alang sa kadagkuan sa kapolisan dinhi sa dakbayan, susiha kinsa ang “major” nga gitawgan sa kapitan.

Siya maoy angayang silotan tungod sa pagtugot nga makalusot ang mga opisyal nga nagpabadlong.

Ug hinaut nga si Mayor Labella mangusog sab pagpitol sa mga opisyal sa barangay nga di mosunod sa iyang mando maalyado man sa politika o kaatbang.

PABADLONG
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with