Gibulgar ni Presidente Rodrigo Roa Duterte atol sa iyang pagpamulong atubangan sa mga sakop sa Philippine Councilors League nga nagpahigayon sa ilang ikanapulo nga nasudnong panagtigum didto sa Pasay City duha ka semana na ang nakalabay nga 60 ngadto sa 70 porsiyento sa kaso sa gidili nga drugas lukop nasud ania sa Sugbo.
Ang Presidente nagkanayon nga ang suliran sa gidili nga drugas anaa na kini sa epidemic nga proporsiyon diin anaa na sa kap-atan ka porsiyento (40%) sa mga Barangay sa Sugbo ang apiktado ug mikabat usab sa unom ka libo (6,000) ka mga polis ang iyang giingon nga may TAMA sa shabu.
Giingon ni Presidente Rodrigo Roa Duterte nga ang iyang tinubdan sa kasayoran nga iyang gipabuto ug gibulgar gikan ra usab sa sulod o insider.
Tungod sa kalapad sa kasayoran nga mahipos sa Presidente, maingon nato nga duol sa kamatuoran ang iyang gibulgar.
Makita usab nato ang pagka duol sa tinuod sa gibulgar sa Presidente tungod sa kadaghan sa gidili nga drugas nga nakonpiskar sa atong kapolisan ug ubang ahensiya sa gobyerno nga gitahasan sa pagsulbad sa suliran sa gidili nga drugas mikantidad og minilyon.
Sa isla sa Sugbo maghilak ang adlaw kun walay makonpiskar nga gidili nga drugas ug walay madakpan nga nagpayuhot niini.
Hinuon ang mga nadakpan suwerte kay sa mga napatay atol sa gipahigayon nga operasyon sa kapolisan. Sa Sugbo ang gidili nga drugas way hubas-hubas.
Tungod niining gibulgar sa Presidente makapangotana ta kun asa mopaingon ang subsub nga kampanya sa kapolisan ug mga lokal nga opisyal dinhi sa isla sa Sugbo batok sa gidili nga drugas?
Unsa man ang buot ipasabot sa pagtaas sa suliran sa gidili nga drugas dinhi sa Sugbo?
Ang Sugbo na ba ang kapital sa gidili nga drugas dinhi sa Pilipinas?