Epekto sa COVID-19

Ang industriya sa turismo maoy grabeng naapektohan sa padayong hulga sa Coronavirus Disease-19 o COVID-19 nga seryoso nga nakakuyanap karon sa dili momenos 30 ka nasud sa kalibotan nga kadaghanan nia sa Asya.

Sa kalibotanong rekord, subra na sa $30 bilyones ang nalugi sa airlines industry sa kalibotan tungod sa COVID-19. Kini wala pay labot sa dakong lugi nga nasibati sa industriya sa hotel ug resort diin hilabihan ka dako ang epekto mugna sa maong sakit.

Dinhi sa Pilipinas, mipiyait na ang mga stakeholder sa industriya sa turismo tungod kay grabe ang pagkahagba sa booking sa mga hotel ug resort. Kini gumikan usab sa travel ban nga giimposar sa nasyonal nga kagamhanan.

Samot na dinhi sa lalawigan sa Sugbo ug Kabisayaan diin gatusan ka libo sa mga Koreano, Intsik ug Hapon ang mobisita matag tuig dili lamang pag-eskwela og Ininglis kondili paglulinghayaw sa atong mga tourist destination.

Gani liboan na ang nawad-an sa ilang trabaho gumikan sa paghubas sa mga langyaw’ng turista tungod sa maong ban. Siyempre dako kini og epekto sa ilang mga pamilya kinsa nagsalig lamang sa ilang inadlaw nga kita. Sa akong nakita, morag minos ang aksiyon sa gobiyerno niining maong suliran. Morag wala niini ma-anticipate ang ka seryoso sa epekto sa kahulaw pagdagsa sa mga langyaw’ng turista tungod sa outbreak sa novel coronavirus.

Hinuon, miarangkada na ang assistance sa lokal nga kagamhanan sa dakbayan sa Lapu-Lapu alang niadtong nawad-an sa ilang trabaho. Apan kutob lamang kini paghatag sa financial assistance ilalum sa cash-for-work program.

Ang industriya sa turismo mao ang usa sa mga nag-unang sektor nga nagpadagan sa ligid sa ekonomiya sa Pilipinas. Niining seryosong problema sa novel coronavirus, dili matukib nga kalugi ang maangkon unya sa ekonomiya tungod sa pagkahagba sa maong sektor.