Maayong silotan

Kun tinuod man nga ang usa ka polis nga nadestino sa Waterfront Police Station dinhi sa Dakbayan sa Sugbo maoy nilungkab sa ilang evidence room ug nikawat sa 12 ka armas, dili gyud siya angay nga pasayloon.

Gidakop sa iyang mga kaubang polis si Corporal Marlito Taboada Portugueza kay matud pa siya ang gitudlo sa usa ka witness nga maoy nanguha sa gitipigang mga armas sulod sa evidence room.

Matud sa hepe sa Waterfront Police Station nga si Major Joemar Pomarejos nga usa ka kanhi detainee nila maoy nakasulti nga si Portugueza ang nilungkab sa evidence room.

Ang maong kanhi detainee naamigo diay ni Portugueza ug dihang nakagawas na mao kuno ang gisugo sa pagdispatsar sa ubang mga kinawat nga armas.

Pagka makauu-waw sa gihimo ni Portugueza kun tinuod man nga siya maoy nilungkab sa evidence room sa Waterfront Poplice Station diin anaa siya madestino isip assistant investigator.

Human madakpi si Portugueza, wala gyud siya magpa-interview sa mga reporters. Ang iyang gihimo naglukob og panapton aron nga dili makita bisan ang tumoy sa iyang buhok.

Para nako, nganong mauwaw man si Portugueza kun dili tinuod nga siya maoy nangawat sa mga armas? Kun ako maoy dakpon, unya dili tinuod ang pasangil kanako, manawag ko og media aron magpa-interview.

Dili angay’ng ikauwaw nga dakpon ka basta dili lang tinuod. Ang gihimo ni Portugueza makapalig-on lang gyud hinoon sa pagduda nga siya gyud maoy nanguha sa mga armas.

Usbon nako, kun si Portugueza man gani gyud maoy nangawat sa mga armas, dili angay dugay-dugayon ang pagtaktak kaniya sa serbisyo ug kinahanglang pasakaan siya og kaso.

Pastilan, dili sayon ang pagsulod sa serbisyo sa kapolisan. Ikaduha, dagko na kaayo karon og sweldo ang mga polis, apan duna gihapo’y mga polis nga makahimo og binuang.

Ang mao nga mga armas, gideposito sa mga tag-iya ngadto sa Waterfront Police Station kay wala pa man sila makapa-renew sa ilang lisensya, apan naunsa ba nga gipangawat na man hinoon.

Kini maoy angay nga timbang-timbangon pag-ayo sa kadagkoan sa kapolisan. Pananglit wala pa ma-recover ang maong mga armas, unsa man, mabayran ba ang mga tag-iya sa kantidad sa ilang mga armas nga nangawala?

* * *

Alang sa kasayuran sa mga nagsunod sa Renbor Patrol, may programa ko sa radyo nga madungog sa sibyaanan DYLA gikan sa alas utso hangtud sa alas nueve sa gabii. Paminawa ang pagtuki nato sa mga isyu nga naglambigit ang publiko aron inyong masabtan pag-ayo ang mga detalyi sa mga panghitabo.