Pulos way bilib sa siyensiya
Managsama ang pagtan-aw nilang Presidente Rodrigo Duterte ug US President Donald Trump sa kalibotanong hulga sa Covid-19: Wa silay bilib sa mga siyentipiko nga nipasidaan nga mahimong di na kapugngan ang pagkatap sa kagaw sa kanasuran gawas sa China ug pulos masaligon sa ilang katakos sa pagbaraw sa kagaw.
Nipasalig si Presidente Duterte nga iyang pangitaon ang kagaw ug nipasidaan nga iyang sagpaon ang kagaw nga iya sang gibalikas.
Sa iyang bahin, nipasangil si Trump nga iyang politikanhong mga kaatbang ray nagpaburot sa hulga sa kagaw.
* * *
Wa kakumbinser sa mga Amerikanhon nga seryuso si Trump sa pagbadlong sa kagaw dihang iyang gitudlo isip kinatibuk-an nga tagduma sa kampanya si Bise Presidente Mike Pence nga gihulagway sab sa mga eksperto nga, sama ni Trump, way pagtahud sa siyensiya.
Sa nangaging katuigan, nangangkon si Pence nga di makamatay ang panigarilyo kay duha sa tulo ka manigarilyo di masakit ug siyam sa napu ka manigarilyo way kanser sa baga.
Siya sab ang gibasol nga responsable sa pagkatap sa HIV sa kalangay sa pagtugot sa needle exchanges sa siya pay gobernador sa Indiana.
* * *
Gipagamay sab ni Presidente Duterte ang hulga sa kagaw pinaagi sa pagsige og ubo sa dul-an sa oras niya nga pakigpung human siya gisaway nga labihang hiloma mahitungod sa hulga ug nangiwit sa pagdeklarar og travel ban batok sa China tungod sa iyang kaikog ni Chinese President Xi Jinping.
Sa iyang pakigtagbo sa lokal nga mga opisyal paghiusa sa ilang mga pangandam batok sa kagaw, nipasalig sab ang presidente nga lig-on ang panagang sa Pilipinas, “kay di dali nga masakit ang mga Pilipinhon.”
* * *
Ambot nagtiaw ba lang, o kumbinsido gyud nga ang bisan unsang hulga mabaraw ra sa sa iyang kaisog, unang gipasidan-an ni Presidente Duterte ang bulkang Taal nga kun di mohunong sa paghulga sa pag-ulbo, iya ning ihian.
Apan mahimong managsama silang Trump nga di matinud-anon sa pagpangandam. Si Trump wa mohatag sa gipangayo nga dugang kahimanan sa Centers for Disease Control and Prevention (CDC). Samtang si Duterte inay modugang nilaslas na hinuon og P10 bilyones sa gahin sa Department of Health (DOH) atubangan sa higanteng kakuwang sa mga doktor ug mga tambalanan.
* * *
- Latest
