Pagkatap gawas sa China
Pipila sa mga kabalaka sa mga eksperto sa nagkalainlaing kanasuran sa padayon nga pagsulbong sa bag-ong mga kaso sa Covid-19 gawas sa China:
May mga natakdan nga wa makabiyahe sa China ni makaduol sa mga sa mga pasyente nga unang nataptan sa kagaw;
Mahimong makasud ang kagaw sa mga nasud nga di andam sa pagsagang ini ug sa pag-atiman sa maapektohan nga mga molupyo; ug
Kon di dayon mapakgang, mahimong mokatap sa tibuok Kalibotan ug makapatay og mas daghan.
* * *
Labing uwahi nga nakugang sa pagsulbong sa mga kaso mao ang Italya, nga naigo og 58 ka bag-ong mga kaso sa usa lang ka adlaw ug kinatibuk-ang 79 na ka pasyente ug duha ka patay (kinatas-an gawas sa Asya):
Gitak-opan ang mga dapit nga naigo, way makasud ug way makagawas, ug giawhag ang kaliboan ka molupyo pagpabilin sa ilang mga pinuy-anan; ug
Dugang 4,200 ka gidudahang mga kaso ang nipakita og mga timaan sa sakit ug gitakda nga kuhaan og swab samples aron matino nataptan ba sa kagaw.
* * *
Nadugangan og 224 ka bag-ong mga kaso sa South Korea nga sa kataposang ihap duna nay 433 ka pasyente. Ingon ini kapaspas ang pagdaghan sa ilang mga kaso sa niaging lima ka adlaw:
Pebrero 18: 31 ka kaso;
Pebrero 19: 58 ka kaso;
Pebrero 20: 111 ka kaso;
Pebrero 21: 209 ka kaso; ug
Pebrero 22: 433 ka kaso.
* * *
Mga simbahan ang gitumbok nga nakapakatap sa pipila sa 89 ka kaso sa Singapore (Grace Assembly of God) ug South Korea (Shincheonji Church of Jesus sa Daegu City kansang 2.5 milyones ka molupyo giawhag sa di una paggawas sa ilang mga pinuy-anan).
Maong way molalis sa panginahanglan sa mga lagda sa Catholic Bishops Conference of the Philippines (CBCP) nga nag-awhag sa minilyon ka manimbahay sa paglikay sa pagkuptanay, pagkuha sa tuslobanan sa balaanong tubig sa ganghaan sa mga simbahan (ang pari nay mopisik sa Holy Water sa mga manimbahay inig sugod sa misa), pagbubo og uga nga abog sa ulo (inay pagbadlis sa basa nga abo sa agarang) karong Miyerkules badlis ug paglitok nga magluhod sa Oratio Imperata batok sa Covid-19 sa matag misa.
* * *
- Latest
