Bisan pa man kun magbalikbalik ang iyang gisulti

Kining magkatiguwang ta mura na gyud ta og Repeat Again bisan sa asang aspetoha tingali. Duna koy nakaila nga sud sa among kukabildo iyang gihisgutan sa makadaghang higayon ang mga pulong nga makapila na niya balika.

Daw sa mabungog man tuod ang akong dalunggan sa pagpaminaw ning maong linalang apan dili ko makahimo sanglit nakita ko man ang akong kaugalingon nga inig abot sa panahon ako usab mahisama kaniya.

Matiguwang ug tingali makasinati og dementia. Ingon ana gyud ang kinabuhi moabot ra gyud ang higayon diin bation nato ang kapalyar.

Pahinumdom kini alang sa mga batan-on nga dili gyud maayong magpataas ug magpasigarbo. Kini tungod kay ang naghinobrang pagpataas ug pagpagarbo mao man ang sukaranan sa atong kapildihan.

Angayan ra sa gihapon nga kita magpaubos bisan pa man taliwala sa maayong kapalaran. Kay sa mosugot kita o sa dili kita molabay lamang sa atong pagkabatan-on.

Ang kabatan-on maoy naghimo kanato nga morespeto pud unta sa mga edaran kay sa wala pa sila mahiabot sa ilang naabtan karon nagagikan pud sila sa atong nahimutangan karon.

Balik sa maong babaye. Bisan pa man kun nagbalik balik ang iyang gisulti apan matataw nato sa mga mata ug sa tingog sa maong babaye ang pagkamatinud-anon ingon man ang pagkamapaubsanon.

Salabtonon gyud ang iyang hangyo. Kay kinsa man tuod ang dili buot magpuyo og hataas nga kinabuhi ingon man kinsa man gud ang dili buot magpuyo og himsog nga kinabuhi. Dili tungod kay daghan pa siya og nawilihan, konndili tungod kay buot pa niyang magmapuslanon alang sa uban ug alang sa iyang pamilya.

Buot pa gihapon siyang mangalagad ug magpakabana sa panginahanglan sa uban.

Angayan lamang nga hatagan siya og igong pagtagad. Kay mag-unsa man tuod ang maayong kapalaran apan pabiling way kahamtong ang imong batasan.

Ang pagpunay niya og balik og sulti dili masaba nga piyang piyang sa pagsamok sa uban kondili melodiya sa pagpahinumdom sa usa ka inahan ngadto sa iyang mga anak nga sa ingon ana nga paagi iyang mapadayag ang iyang dakong gugma ngadto kanila.