Ordinansa ni Niña alang senior citizens

Aniay maayong balita alang sa mga lumulopyo dinhi sa dakbayan sa Sugbo, ilabina niadtong mga senior citizen kinsa ang uban nagsalig na lamang sa tabang pinansiyal gikan sa ilang pamilya ug sa lokal nga kagamhanan matag bulan.

Adunay giduso sa Konseho ning ning bag-o pa lamang si Konsehal Niña Mabatid nga usa ka ordinansahon nga nag-require sa mga business establishment sa siyudad pag-hire og mga trabahante nga mga senior citizen.

Sa iyang proposed ordinance, nagkanayon si Mabatid sa North District nga kinahanglan dili momenos sa tres porsiyento sa workforce sa usa ka establisemento sa private sector ning dakbayan maglangkob sa mga senior citizen.

Alang kang Mabatid, angay lamang nga hatagan og dakong kahigayonan ang atong katigulangan nga makatrabaho. Kini sa ingon nga makapadayon silang adunay panginabuhian aron dili magsalig sa ilang pamilya.

Maayo kini nga lakang ni Mabatid diha sa konseho alang niadtong liboan ka mga senior citizen sa siyudad. Dili gayud nato ikalimod nga dako kini nga tabang alang kanila aron nga magpadayon silang produktibo nga mga sakop sa katilingban.

Hinuon, aduna nay balaod nga susama niini. Ang Republic Act 10911 o ang Anti-Age Discrimination in Employment Law nagdili na sa mga establisemento sa nasud pagbutang og age limit sa ilang pag-hire og mga aplikante.

Sa implementasyon sa maong balaod, aduna nay mga kampanya sa nasud ang mo-hire og mga senior citizen isip pagsunod niini.

Gani, adunay ilado nga fast food chain ang nagsugod na’g pangempleyo og mga trabahante nga 60-anyos pataas.

Kini nga sistema hagbay ra nga gisagop didto sa adunahang kanasuran, ilabina didto sa Europa, Estado Unidos, Canada, Australia ug Japan. Ug angay lamang nga sagopon ug palamboon kini dinhi sa Pilipinas

Hinaut nga makakuha og dakong suporta gikan sa mayoridad sa konseho sa dakbayan sa Sugbo kining proposed ordinance ni Mabatid. Kini aron sa ingon nga dali ra kini nga mapasar ug maimplementar isip tabang ngadto sa atong mga katigulangan.