Kakuwangan

Nabisto ang dako pa gyud nga kakuwangan sa nasudnong gobyerno pagtubag sa krisis sa panglawas niining nagpadayong kahasi sa publiko nunot sa hulga sa makamatay nga kagaw gikan sa Wuhan, China.

Wala makatabang paghupay sa kahingawa sa publiko ang kalangan sa Department of Health paghatag og klarong detalye sa mga tawong gidudahang nataptan sa novel coronavirus.

Bisan ang paghatag sa tukmang kasayuran mahitungod sa flights ug mga dapit nga gisuroyan sa tulo ka mga langyaw gikan sa China nga nagpositibo sa nCoV labihang dugaya nakahatag sa DOH. Tungod sa kalangan napugos sa pagtagna-tagna ang katawhan nga nakasamot sa ilang kahadlok.

Di masabtan sa katawhan nganong nagduhaduha ang DOH sa paghingalan sa mga hotel, airline, ug barko nga gisakyan sa tulo ka mga langyaw dihang miabot ni sa nasud agi sa Mactan Cebu International Airport ug mibiyahi paingon sa Negros Oriental ug ingon man sa Bohol.

Wala hisabti sa DOH mga mas dali ug sayon ang trabaho pag-ila kinsay mga gikahimamat niadtong mga nataptan sa sakit tungod kay makatabang ang publiko pagpangita nila.

Mismong ang mga hingtungdan nga kauban sa biyahe makahibawo ug makaduol dayon sa mga awtoridad aron makapahiling.

Misamot ka klaro ang ka way sistema sa DOH atol sa gipatawag nga hearing sa Senado.

Atol sa hearing sa Senado gihimong rason ni health secretary Francisco Duque ang matud pa pagdumili sa mga airline companies paghatag og kopya sa manipisto sa mga pasahero.

Apan nabuking si Duque dihang mitug-an ang mga airline companies nga ang tanang dokumento nga gikinahanglan ila na nga gitugyan sa Bureau of Quarantine, usa sa mga ahensiya ubos sa DOH. Laing palpak sa DOH mao ang kalangan nila sa pagpa-cremate sa patay'ng lawas niadtong namatay sa nCoV didto sa San Lazaro Hospital.

Ang ilang rason mao nga way punerarya nga modawat sa serbisyo. Sa laktud dili andam ang DOH sa ingon niini nga sitwasyon.

Dinhi hinuon sa Sugbo, dako ang konsuwelo sa mga Sugboanon tungod sa kapaspas ni Gobernador Gwendolyn Garcia paghimo og mga lagda aron kapugngan ang pagsulod sa sakit dinhi sa ato. Nagpusot-pusot ang mga executive order nga giluwatan sa gobernador nga gitumong pagpabiling luwas sa Sugbo gikan sa makamatay nga kagaw.

Angayang sundon ni Duque ang kaabtik sa gobernador sa Sugbo pagprotehir sa publiko.