Mask panic buying gipahimuslan

Gilinog ang tibuok kalibotan pagkatap sa makalilisang ug mananakod nga 2019 Novel Coronavirus (2019-nCoV) nga nanglupad gikan sa Wuhan, China.

Matud pa sa usa ka langyawng mantalaan, mga doktor higpit nagbantay sa delikadong kahimtang sa 41 ka pasyente, kinsa nakonpirmang nataptag 2019-nCoV ug na-admit sa usa ka ospital sa Wuhan niadtong Disyembre 16, 2019 hangtod Enero 2, 2020.

Sagad sa gipakitang sintomas sa nalanding sa tambalanan, 98% kuno may hilanat, 76% giubo ug 44% ang gibatig pagpangapoy (myalgia or fatigue). Pagka Enero 22, 2020, may 68% kunong pasyente ang nakagawas sa ospital, pero 15% ang namatay.

Nagdagan ang mga adlaw, nagkadaghan ang mga Insek sa Wuhan ang nataptan og 2019-nCoV. Gani, gisirhan man ang kinatibuk-ang lugar nga may 35 ka milyong lumolupyo aron mapugngan ang pagkatap sa gikahadlokang novel corona virus.

Apan sobra ka isog ug kagamhanan ang maong kagaw. Kay hasta ang mga duol ug layong kanasuran, gisulong sab ning killer virus nga gituohang nakuha gikan sa pagpunayg kaog kuwaknit.

Naalarma tanang kanasuran. Samot na, ang Pilipinas nga daghang turistang Intsek ang mobisita halos kada adlaw, diin gikonpirmar sa Department of Health Secretary Francisco Duque III nga nakasulod na ang maong virus dinhi sa ato pinaagi sa usa ka 39 anyos nga babayeng pasyente, kinsa mibiyahe dinhi sa Pilipinas gikan sa Wuhan, China via Hong Kong sa miaging Enero 21 ug na-admit sa ospital pagka Enero 25. Gumikan ning maong balita, nag-face mask panic buying ang katawhan. Dinhi sa Cebu, tanang botika gidugok sa mga mamalitay. Baligyang surgical/face masks hurot! Ultimong tuyoong botika gisum-ok sa mga nanginahanglan. Nga otro pong nahutdan.

Mga kauban ko sa trabaho, natarantar intawon pagpangitag masks nga baligya. Hasta mga gagmayng tindahan sa Carbon market, gisulayag adto.

Tuod man, may nakit-ang gitapok-an sa daw nag-inilogay nga pumapalitay. Nakaremedyo man tuod siyag napulo ka buok, apan ang presyo hasta kalima pil-a. Tiaw bay, ang tag P4 nga facemask, kalit lang mitubo ngadto sa tag P20.

Pero, gikuninitan gihapon. Ug gikulang pa! Pagkatig-ag kasingkasingkasing, negosyanteha! Ning panahon nga magkaluy-anay unta ang matag usa kanato, maoy mipasulabi sa iyang galamhan ang kahakog sa salapi.

Malipay kaha ang Ginoo  ning iyang  kapamahimuslanon?