Role model si Kobe
SAKSAK SINAGOL - Lucky Malicay (Banat) - January 29, 2020 - 12:00am

Bisan tuod og usa ako ka lunod-patay nga fan sa Los Angeles Lakers sa National Basketball Association o NBA, dili si superstar Kobe Bryant maoy akong paborito nga magdudula sa maong team o sa kinatibuk-ang liga.

Nagtubo ko niadtong dekada otsienta mao nang kadtong hut-ong nilang Magic Johnson, Kareem Abdul Jabbar ug James Worthy maoy akong paborito, ilabina niadtong panahon sa ilang rivalry sa Boston Celtics ug Detroit Pistons.

Hinuon wala man sab magpalupig ang grupo nilang Bryant, Shaquille O’ Neal ug uban pa niadtong 2000s. Gani ang rivalry nila sa San Antonio Spurs maoy giingon sa mga NBA experts nga labing kulba-hinam sa kasaysayan sa liga.

Ug dili nato ikalimod nga si Bryant maoy usa labing tang-an nga magdudula sa NBA. Dili lamang siya miaswat sa NBA ngadto sa kalibotanong popularidad niini kondili siya pa ang nahimong nawong niini.

Sa iyang generasyon, dili lamang na-identified si Bryant isip usa ka Laker o NBA player. Basta maghisgot na gani kita sa iyang ngalan, dili lamang ang liga sa NBA ang ipasabot nato kondili ang kinatibuk-an nga dula sa basketball.

Sama kang Michael Jordan, LeBron James ug Stephen Curry ug uban pang misikat sa NBA, si Bryant maoy usa sa miisa sa popularidad sa maong dula isip usa sa mga nag-unang paugnat sa kusog sa kalibotan karon.

Dinhi sa Pilipinas, dili matukib ang popularidad ni Bryant. Gani, nahimo siyang susama sa honorary citizen dinhi sa nasud tungod kay hilabihan ka suod niya ang mga Pilipino. Nahinumdom ko dihang mibisita siya dinhi sa nasud diin nalingaw siya’g sayaw sa tinikling atol sa usa ka gathering.

Niining iyang hinanaling pagpanaw sa pangidaron nga 41 anyos, milyones tibuok kalibotan ang nagmagul-anon. Daw dili kita makatuo nga sa atong pagbangon usa ka buntag niana, maoy misugat kanato ang mangilngig nga balita sa pagkahagba sa helicopter nga iyang gisakyan uban sa iyang anak ug laing pito ka pasahero.

Sayang ang iyang pagkamatay sa batang pangidaron. Dako pa unta siya og matampo sa iyang komunidad ug sa dula nga basketball diin siya misidlak ug nahimong role model ngadto sa kabatan-onan.

KOBE
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with