Naabtan og 12 ka adlaw ang Department of Health (DOH) una nakatino nga kasarangang hilanat ang nitakboy sa 5 anyos nga batang lalaki nga taga Wuhan, China. Ambot mao ba sab kadugay ang pagkatanggong sa ubang mga pasyente nga gidudahang natakdan sa bag-ong kagaw o makakita nang DOH og mas laktod nga paagi.
Apan ang pasalig sa DOH nga wa pay bag-ong coronavirus ang Sugbo ug Pilipinas hangtod karon wa kabadlong sa pagkatap sa mga huhungihong sa social media. Gidudahan na ganing kamatinud-anon sa kadagkoan sa DOH. Hinaot nga ang katawhan mosusi unsay tinuod sa di pa motabang pagpakatap sa iresponsableng mga paukyab.
* * *
Labaw pang gidudahan ang mga numero nga gipagawas sa China. Tungod sa taas nang kasaysayan sa China sa pagtago sa makadaut nga kasayuran, gikabalak-an nga piloon og kanapu ang tinuod nga gidaghanon sa nangamatay ug natakdan sa kagaw sa Wuhan ug kasilingang mga dakbayan.
Gihangop hinuon sa World Health Organization (WHO) ang inadlawng kasayuran nga gihatag sa China. Gituohan nga ang bisan unsang kang-a sa mga numero nanukad sa pag-una pag-ihap sa labing seryusong mga pasyente ug di sa pagpamakak.
* * *
Mao ni ang labing uwahing opisyal nga ihap sa China: 41 ang patay (kasagaran taga Wuhan, kapin sa 60 anyos ug may gihambin na nga laing mga sakit), kapin sa 1,300 ang natakdan ug kaliboan ang gidudahang mga kaso.
Nikatap nang sakit sa 30 ka lalawigan, rehiyon ug kalungsoran sa China. Wa na pagawasa ang 33 milyones ka molupyo sa Wuhan ug laing 13 ka dakbayan (gikanselar ang tanang biyahe pagawas sa ayroplano, tren ug bus) aron pagpugong sa dugang pagkatap sa kagaw.
* * *
Gikabalak-an hinuon nga uwahi nang sugo ni Presidente Xi Jinping sa China sa pagtak-op sa Wuhan ug ubang mga dakbayan sa niaging semana. Kay hagbay rang nakakatap ang kagaw sa uban bahin sa China ug kalibotan.
Giawhag nang resignasyon sa mayor sa Wuhan, Zhou Xianwang, kinsa bisan sa pagsulbong na sa mga natakdan sa bag-ong kagaw nagpasiugda sa tinuig nga tapok sa Lunar New Year sa 40,000 ka pamilya nga nagsawo sa 14,000 ka putahe niadtong Dominggo, sa panghinaut nga malista sa Guinness World Records.
* * *