Unang adlaw karon sa 2020 ug kumusta ang selebrasyon sa inyong pagsugat sa Bag-ong Tuig? Makabungol ba nga selebrasyon ang inyong giobserbar sa pagtuo nga buwenas unya ang paglawig niining Bag-ong Tuig?
Kitang tanan, dato man o pobre, nangandoy og buwenas nga kinabuhi niining 2020. Nga unta mas maayo pa sa gitalikdan nga tuig kun maghisgot kita sa kahimtang sa panalapi ug pisikal nga kondisyon sa kinabuhi.
Sa nakalabay nga tuig, hilabihan ka daghan sa pagsulay ang naagian natong mga Pilipino.
Gikan sa problema sa nagkagusbat nga peace and order situation ug kaguliyang sa politika hangtud na sa nagkadaiyang katalagman.
Dili nato malimtan ang 2019 nga usa ka tuig sa kalamidad.
Didto sa Mindanao daghang kinahuhi ang nakalas ug dakong kadaut sa kabtangan ang nasinati sa sunodsunod nga linog nga mitay-og sa rehiyon sa nangaging mga bulan.
Ug kinsa bay makalimot sa mga bagyo nga naandan nang mobisita sa Pilipinas matag tuig? Gani sa labing ulahi nga bagyo nga mihapak sa nasud, daghan ang patay ug dakong kantidad sa kabtangan ang nausik dinhi sa Kabisayaan.
Usab, wala gayud molurang ang problema sa kahusay ug kalinaw sa nasud.
Patay didto, patay dinhi. Ug bisan sa gipakusgan nga gubat sa kagamhanan batok sa gidiling druga, padayon ang pagkuyanap niini sa tibuok nasud.
Ug samot nga migara ang kagaw sa politika dihang nag-iyahay og pahit sa matag usa ang administrasyon ug oposisyon sa halas tanang isyu sa ilang kumbati pagsungkit sa simpatiya sa katawhan.
Ug makapaabot kita nga mosamot pa kini karong tuiga. Apan bisan pa man sa mga kalamidad ug ubang kaguliyang sa niaging tuig, hugot atong paglaum nga unta mas swerte ang bag-ong tuig alang kanato. Hinuon, mas maayong padayon lamang kita nga positibo sa atong panglantaw.Malipayong Bag-ong Tuig kanatong tanan!