Karong sunod tuig, magtigum na ang mga sakop sa Cebu City Traffic Management Coordinating Board ug among hisgotan ang nagpasad lang nga mga sakyanan nga giparking ra sa karsada panahon sa gabii.
Ang mga tag-iya niining mao nga mga sakyanan, walay kaugalingong grahe para sa ilang mga units. Mahimo ra man unta nga sabton kun ang sakyanan ipadaplin lang gyud nga libre ang karsada, apan dunay uban nga anaa gyud sa karsada mi-parking.
Wala sila’y kaikog nga tungod sa ilang mga sakyanan nga anaa sa karsada giparking, makapahasol kini sa ubang mga motorista nga mangagi.
Tambag nako sa mga tag-iya niining maong mga sakyanan, nga karon pa lang, pangita na mo og kaparkingan nga dili makahasol sa uban.
Akong dasigon ang katawhan nga moreklamo gyud mo kay kun ang atong mga karsada himoon na nga parking area sa inyong mga silingan, kun may sunog, dili dayon makasulod ang mga fire trucks.
Kining among grupo nga Cebu City Traffic Management Coordinating Board gilangkoban sa mga direktor sa LTO, LTFRB, CITOM, City Legal Officer ug daghan pa.
* * *
Ang uban nabalaka kay moigo man ang bagyong Ursula dinhi sa Kabisayaan atol nga nagsaulog kita karon sa Pasko. Pero ako, malipay ko kay tungod sa bagyo, makamugna kini og uwan, ug makadugang kini sa tubig nga magamit sa MCWD.
Hangtud karon, ubos pa gihapon ang tubig sa duha ka water dam sa MCWD sa Barangay Buhisan, Dakbayan sa Sugbo ug sa Jaclupan, Talisay.
Kini maoy usa sa rason ngano nga daghang mga dapit ang wala kaayo’y agas sa tubig.
Mao kana ang rason nga malipay ko nga mag-uwan kay magsawod man ko og tubig nga maoy magamit nako sa pagpanglaba, pagkaligo ug panghugas.
* * *
Kun ako’y pagbut-on, patyon dayon nako kining mga tawo nga mangawat, manulis ug ilabi na kining manglaslas og mga bag aron kuhaon nila ang kuwarta ug ubang mahalong gamit nga anaa sa sulod.
Dimalasa lagi namo. Ang akong 13th Month Pay sa DYLA ug gipun-an pa nako, gihatag nako sa akong misis, para magasto niya niining Pasko.
Niadto unta siya sa SM City niadtong Domingo, apan wala siya makabantay nga gilaslasan diay ang iyang bag ug nakuha ang dul-an sa P20 mil.
Unya kay “uno porsiyento” ra man ang recovery rate sa kapolisan basta ingon niana, mao nga lain na usab nga “charge to experience” sa akong misis. Demalas gyud kaayo, kay mao pa’y pobre gisamotan gyud tawon.