Pagnihit sa mga nurse

Nakapaalarma gayud kining pagnihit sa mga nurse sa mga pribadong hospital dinhi sa Sugbo tungod lagi sa pagbiya sa kadaghanan kanila sa ilang trabaho gumikan sa ka gamay sa ilang suweldo kun itando sa ilang counterpart sa mga government hospital.

Kini bisan pa man sa liboan ka mga migradwar sa maong propesyon gikan sa mga lokal nga unibersidad. Gani liboan usab ka mga graduate ang mopasar sa licensure examination matag tuig nga sarang makapangaplay sa mga lokal nga hospital.

Sa ako nang gikaingon, nag-unang rason niini mao ang ka gamay sa ilang suweldo.

Mao nang daghan kanila ang molalin na lamang ngadto sa mga pangpublikong hospital diin gawas sa dagko pa ang sweldo, daghan pa og insentibo.

Gani, hapit na usab ipatuman ang lakang sa gobiyerno nga nagsaka sa sweldo sa mga government nurse.

Basi sa balaudnon, mahimo nang P31,000 ang labing ubos nga suweldo sa mga nurse sa gobiyerno, mas labing taas pa kay sa mga suholan sa ilang counterpart sa mga private hospital.

Ambot ning mga pribadong hospital nga barat man usab mohatag og maayong sweldo sa ilang mga staff. Dako man unta sila og kita tungod lagi kay daghan man usab silag mga pasyente kinsa mo-avail og maayong serbisyo.

Dili nato ikalimod nga ang mga nurse adunay labing usa sa ubos nga sweldo sa tanang mga professional sa nasud.

Gani adunay uban kanila nga nagdawat lamang og suholan nga ubos pa sa minimug wage.

Kini bisan pa sa ka dako sa ilang gasto panahon sa pag-eskwela.

Mao nang dili na usab nato sila mabasol nga manimpalad sa laing nasud diin hilabinan ka dako ang sweldo sa mga nurse.

Gani ang uban niadtong nagpabilin dinhi sa nasud mas gipiling adto na lamang manimpalad sa industriya sa business process outsourcing.

Angay nga hatagan og dakong kasulbaran kining seryosong problema sa pagnihit sa mga nurse sa mga pribadong hospital sa nasud.

Hinuon ang nag-unang sulbad niini mao ang aksiyon sa mga hospital management pagtaas sa ilang sweldo aron usab nga maingganyo silang mopabilin sa ilang trabaho.