Nagpatupi sa buhok o natulog atol sa linog si Pres. Duterte, bahala og unsa pa iyang gibuhat basta ang importante nga naatiman ang mga naapektahan didto sa Mindanao. Di na angay makurat kay pirme naman nga di magkatakdo ang pamahayag sa mga suod nga kauban ni Duterte bahin sa iyang mga gibuhat.
Sa miaging adlaw pagtay-og sa 6.9 magnitude sa Davao del Sur nga gikamatay og duha ug daghan ang naangol samtang duna pay na-trap sa mga nangatumpag nga building, nangaguba nga eskuylahan ug police station sa Padada. Gawas sa Davao del Sur, duna say mga danyos nga nasinati sa Soccsksargen.
Ang National Disaster Risk Reduction and Management Council miingon apil sa mga nangahugno ang mall didto sa Padada, duna say namatay nga bata sa Matanao. Kapin 300 ka balay sab ang na-damage sa Hagonoy, Davao del Sur.
Tungod sa maong linog, dunay power outages nasinati. Maayo nalang nga tanang mga taytayan mahimo pang kaagian para sa mga relief ug rescue operations.
Ning nakalabay nga duha buwan, sagunson ang nasinating mga paglinog didto sa Mindanao nga nakapalisang sa mga molupyo didto.
Gani ning kataposang insidente may natala ng kapin 450 ka mga aftershocks didto sa Davao.
Sama sa nasinating kakulba sa Central Visayas niadtong miigo ang linog sa tuig 2013, parehas ra ang kakulba nga nasinati karon sa Davao.
Niadtong nakalabay nga mga bulan sa Oktubre ug Nobiyembre nakasinati og mga kusog nga linog ang Mindanao, maong dili lalim ang gibati sa mga tawo karon.
Sa mga biktima nga nawad-an og panimalay makaguol kini kanila tungod kay nagsingabot na ang Pasko ug lisud ilang kahimtang.
Karong panahon sa kapaskohan maayong ipakita sa mga Pilipino ang pagmahal ug mopaambit sa grasyang naangkon ngadto sa mga nagkinahanglan didto sa Davao.
Sahi man sab kaayong ang uban naglingaw-lingaw kauban ilang pamilya samtang didto sa Davao dunay mga pamilyang wala masaw-an sa Pasko ug naa kanunay ang kakulba.