EDITORYAL - Kalainan sa pribado ug GOCC

Sumala pa sa balita maabtan pa og duha ka tuig kining problema sa supply sa tubig didto sa Metro Manila. Maypa sila, nabanabana na, dinhi kaha sa Sugbo, kanus-a man?

Itandi sa Luzon, ang water suppliers didto sama sa Manila Water ug Maynilad Water Services adunay daghang kakuhaan og supply apan tungod lang sa kadako sa populasyon ug sa kalapad sa gisuplayan maong nagnihitnihit gyud sila didto.

Basin ang imprastraktura ray kinahanglang dugangan sama sa mga tubo gikan sa mga tinubdan padung sa mga konsumidor ang kuwang.

Dugang imprastraktura ug pagpaayo sa mga karaan ug nangabuslot nga dagkong tubo sa tubig mahimo rang mabalik sa normal ang supply sa tubig didto sa Metro Manila.

Paspas ra kini masulbad kay pribado mang mga kompanya ang Maynilad ug Manila Water. Ug labaw sa tanan walay politika nga maapil kay wala may mag-ilogay sa pwesto dili sama sa mga water districts nga gipadagan sa gobiyerno.

Sama dinhi kaha sa Sugbo, ang Metro Cebu Water District (MCWD) usa ka government controlled corporation (GOCC) nga gipadagan sa gobiyerno.

Nagatubang og krisis sa tubig ang Metro Cebu dili lang tungod sa kakuwang sa mga tubo, kondili kuwang gyud ang mga tinubdan niini ug may pakapin pang politika. Sa mga nangaging mga adlaw adunay kasikas sud sa MCWD Board sa dihang gipang-terminate ni Cebu City Mayor Edgardo Labella ang pipila ka mga sakop sa board nga kanhi tinudlo sa kanhi administrasyon.

Mao ni ang kalainan sa GOCCs ug pribadong nagdumala. Ang GOCC may politika nga nalambigit samtang ang usa, ang tagiya ray magbuot kinsa iyang ibutang.  Sa GOCCs kadaghanan kadtong duol sa luwag, bahala’g di kaayo haom sa pwesto. Apan sa pribadong kompanya, kadto gyung makamao sa trabaho ang ilang ibutang kay mausik ilang puhonan kay negosyo baya kini. Masulbad kaha sud lang sa duha ka tuig kining kanihit sa suplay sa tubig nga nasinati karon sa Sugbo?