Gihatagan og pabor
RENBOR PATROL - Rene U. Borromeo (Banat) - December 10, 2019 - 12:00am

Angay gyud nga kining private company nga gikontrata sa dakbayan sa Sugbo pagpangolekta sa bayad sa mga motorista nga moparking daplin sa karsada, wad-on na ini’g human sa kontrata.

Alkanse gyud kaayo ang siyudad niining gisudlan nga kontrata uban sa Tokogawa Global Corporation nga maoy gitugyanan sa pagpangolekta sa parking fees.

Sa wala pa ang Tokogawa, ang CITOM mokolekta og mga P40 milyones nga parking fees sa usa ka tuig, ug nag-usbaw ang collection kada tuig. Ang Tokogawa mobayad lang ngadto sa siyudad og P8.7 milyones ang tuig.

Dunay mga dapit kaniadto nga wala butangi og parking slots nga ila karong gibutangan nga walay pagtugot sa City Council. Usa niini mao ang likud nga bahin sa Basilica del Santo Ni?o sa dalan P. Burgos.

Ambot og nakabantay ba kamo nga kaniadto, usa ra ka lumbay sa mga motorsiklo ang gitugotan nga magparking diha, apan diha nga ang Tokogawa mibanos na pagpangolekta, gidoble na nila ang han-ay sa parking.

Dili ba usa kini ka pagpangabuso aron modako ang ilang koleksyon? Mao kini ang rason nga isip sakop sa gimugna ni Mayor Edgar Labella nga Cebu City Traffic Management Coordinating Board, mihimo ko og pasiuna nga sugyot nga tangtangon na kining Tokogawa inighuman sa kontrata.

Awhag nako sa mga konsehal sa Dakbayan sa Sugbo nga mosuporta unta niini aron dili kamo makatahapan nga nanguwarta. 

* * *

Magpahimangno diay ang CITOM ngadto sa mga tag-iya og sakyanan nga pangita gyud mo og kaparkingan nga dili diha daplin sa mga karsada nga makahasol sa mangagi.

Siyaro, nakapalit gani mo og sakyanan unya dili mo makapangita og kaparkingan niini nga dili kamo makahasol sa ubang motorista? Daghan kaayo nga nangreklamo.

Bisan diri sa GMA Road nga gikan sa Barangay Hall sa Busay paingon sa GMA-7 Complex, ang akong amigo nga si Junnie Gelbolingo nakabantay na sab nga nanaghan ang mga sakyanan nga anha iparking panahon sa gabii.

Pangita mo og lugar nga himoon nimo nga grahe kay kun may sunog, unsaon man sa pagresponde dayon sa mga fire trucks? Diha sab sa karsada likud sa Marco Polo Plaza Hotel, gigamit sab nga grahe sa mga tag-iya’g sakyanan.

Kun may sunog gani unya dili makaresponde dayon ang mga fire trucks, unya mahurot ug kasunog ang inyong kabalayan, kamo ra gyud ang mabasol sa wala ninyo pagpakabana.

Ang inyong presidente sa kahugpongan kanunay gyud nako nga gipahinumdoman niini. Kon wala mo’y grahe, wala na lang unta mo mamalit og sakyanan.

Unsa, ang gobiyerno na sab ang inyong basulon niini nga wala mo’y grahe?

TOKOGAWA GLOBAL CORPORATION
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

SIGN IN
or sign in with