Paglambo sa Kaohsiung

KAOHSIUNG, Taiwan — Familiar na sa mga Subuanon, ilabina sa mga molupyo sa dakbayan sa Sugbo, ang ngalan niining maong lugar. Kini tungod lagi kay sister city man kining dako nga siyudad sa southern Taiwan sa dakbayan sa Sugbo.

Ilalum niining maong relasyon pangdiplomasiya nga milanat na og pipila ka dekada, daghan ang benepisyo nga nadawat sa lokal nga kagamhanan sa dakbayan sa Sugbo gikan sa gobiyerno sa siyudad sa Kaohsiung.

Siguro nakakita na kamo sa mga Kaohsiung buses nga gipanag-iya sa siyudad nga gamiton niini panahon mga transport strike, excursion sa mga kabataan. Gikan kana dinhi nga gi-donate sa kagamhanan sa Kaohsiung ngadto sa siyudad sa Sugbo.

Sulod na sa pipila ka dekada, hilabihan  ang paglambo sa ekonomiya sa dakbayan sa Kaohsiung. Gani mao kini ang sentro sa komersiyo ug patigayon sa southern Taiwan, diin nahimutang ang dakong port area sa nasud.

Ang paglambo sa Kaohsiung nagsugod sa dihang panahon sa pagsakop sa mga Hapon sa Taiwan. Nakita sa mga Hapon ang dakong potensiyal sa Kaohsiung isip sentro sa negosyo sa southern Taiwan mao nang nagtukod sila og dakong seaport dinhi.

Ang Kaohsiung nahimo nga maritime center sa Taiwan. Apan sa nagdagang mga katuigan, misulbong usab ang industriya sa turismo niining dakbayan ug nahimo kini nga nag-unang tinubdan sa kita sa kagamhanan.

Karon, ang Kaohsiung maoy nag-unang destinasyon sa turismo sa Taiwan. Grabe usab ang infrastructure development dinhi, ilabina sa natad sa transportasyon nga daghan sa mga foreign tourist ang nakadayeg. Bilib ko sa estratehiya sa lokal nga kagamhanan dinhi pagdani og mga bisita.

Hinuon, swerte ang mga Pilipino, ilabina ang mga Sugboanon, tungod kay dali na kaayo ang pag-anhi dinhi. Kini gumikan kay milugak na ang Taiwanese government ug gitugotan na kita pagsulod sa Taiwan nga walay visa.

Ug dili na usab kita mahasol sa atong pag-anhi gumikan kay adunay flight gikan sa Cebu padulong sa Kaohsiung. Gani ang AirAsia adunay biyahi ka tulo sa usa ka semana gikan sa MCIA padulong dinhi. Dako kini na bintaha alang sa mga Sugboanon.