Diha sa pagkamahinangpon ug pagkamapasalamaton

Matag tahas nga ihatag kahigayonan man sa pagpangalagad ug di lang kay kahigayonan sa pagpangalagad kondili kahigayonan usab sa pagpadayag sa imong kaugalingon kini tungod kay ang matag kaugalingon nahimo mang konektado sa bisan unsa nga atong ghimo. Ning paagiha ang bisan unsa nga atong gihimo ang magbilin man gyud ug lama sa atong pagkatawo. Unsay buot ipasabot niini?

1. Kun dunay mosugo nimo sa pagbuhat og bisan unsang makaayo ngadto sa uban, angayan lamang nga imo kining dawaton kay lagi kahigayonan man kini sa paghatag sa imong kaugalingon alang sa mas makahuloganong panlimbasog ug pagpamuhat.

2. Ang tawo nga misugo kanimo dunay dakong pagsalig sa imong katakus ug angay lamang nga dili himoong babag ang personal nga kahadlok aron lamang magdumili sa bisan unsang kahigayonan aron ikaw makapangalagad ngadto sa uban.

3. Kahigayonan usab kini sa paggamit sa imong hunahuna ug kaantigohan aron mas makita ug masinati mo ang mas halapad nga dagway sa kalibutan sa pagtambayayongay.

4. Ug labaw sa tanan, kahigayonan usab nimo kini sa pagpasalamat sa Dios gumikan sa mga grasya tungod sa mga grasya nga iyang gipabuhagay nganha nimo.

Nahinumdom ko kaniadto ni Bishop Dennis Villarojo kalabot sa mga assignments. Ingon siya nga dili kuno angay nga magbagulbol o moreklamo, gani, mas angay pa natong magpasalamat kay dili tanan ang gihatagan og kahigayonan nga mahatagan og kahigayonan nga sa uban makaalagad pinaagi sa mga sakramento ug sa imo mismong kinabuhi. Tulukibon ang maong pahimangno tingali kay dunay mga higayon nga ako segurong gikwenta ang kasinatiang negatibo kaysa kasinatiang maayo.

Sa laing bahin, nahimong daw sa idlas alang kanato ning mga panahona ang mga pagpikpik sa pagdason ug pagdasig sa atong isigkaingon. Kay bisan asa anaa man ang mayubitong pagsaway sa atong mga kahuyangan nga maoy hinungdan nuon sa kalaglagan sa atong mga pangandoy Mga pangandoy nga mahimong pakgangon kanila nga wala makakita sa bili niini kay sila mismo ang wala man magmapasalamaton sa kinabuhi. Kay kun mapasalamaton pa sila, nan, nahimong mas malipay ug masibot sila kun madungog nila ang pangandoy sa uban. Kaha, buot nilang ipatakod mismo ang ilang negativity sa mga tawong dunay positive mindset.

Mao nga ang matag ginikanan gyud unta mapasalamaton sa ilang mga anak nga nahimong bunga sa ilang gugma sa usag-usa. Mao nga ang pagdasig gikan kanila dako kaayo og kahimoan aron ang anak mismo ang makasabot kun nganong bisan pa man sa malisud nga panaw sa kinabuhi anaa gihapon ang pagpasalamat. Ang mga bata nga wala tudloi unsaon pagpasalamat ang dili maantigong mopuyo niini. Sa linghod pa ang panuigon ni dodong ug inday angayan lamang nga tudloan siya nga bisan dyotay nga kaayohan angayan gyud pasalamatan. Ug ang matag bag-ong higayon sa paglihok dawaton unta tugob ang pagkamahinangpon.