Daghan na’ng mga kabataang Pilipino nga nag-edad og 11 ngadto sa 17 anyos ang luyahon og lawas kun itandi sa ubang mga nasud sumala pa sa usa ka pagtuon.
Sa pagtuon nga gihimo sa The Lancet Child & Adolescent Health, nakita nga ang Pilipinas kuwang nalang mabutang sa kinaubsan sa 146 ka mga nasud nga gipaubos sa pagtuon kabahin sa pisikal nga mga kalihokan sa ilang mga kabataan.
Matud pa nga 93.4% sa mga batang Pilipino nga nag-edad og 11 hangtud 17 anyos nga nagtungha karon kuwang og physical activity subay sa resulta sa gihimo nilang pagtuon niadtong tuig 2016.
Kauban sa Pilipinas nga naa sa ubos sa listahan ang Cambodia, South Korea ug Sudan. Giingon nga mas kuwang og mga pisikal nga kalihokan ang mga kabataang lalaking Pilipino itandi sa mga babaye niini.
Ang gipasabot nga pisikal nga kalihokan mao ang sports, naandang duwa-duwa ug kalingawan diha sa karsada sa mga bata kaniadto, paglaag-laag sa mga bukid, paglangoy-langoy sa mga sapa, pagkatkat sa mga kahoy ug uban pa. Kining tanan tagsa nalang kaayo makita nga gibuhat sa mga bata karon. Ang mga bata kaniadto giingon nga mas gahi taptan og sakit tungod sa ilang mga pisikal nga kalihokan kauban sa ilang mga kaduwa.
Gawas sa benepisyong makuha sa panglawas gikan niini, mas mosaka ang salabotan sa bata kay pirme man silang dunay interaksyon sa ubang mga bata. Karon, naghinobra ang pagpangga sa mga ginikanan sa ilang mga anak pinaagi sa pagdili kanila sa pagpaduwa sa gawas, pagpalit og mga gadgets, computers kay dili lagi gustong matakdan og sakit sa ubang bata ang ilang mga anak.
Dugangan pa nga patuyangan ra pagpakaon og dili hustong diet unya kuwang sa pisikal nga aktibidades hinungdan nga daghang bata karon ang obese o naghinobra ang katambok apan luya og lawas ug masakiton.
Gawas nga luyahon og lawas, himi ug palahilak ang mga bata kay dali rang saputon ug di makamaong makighugoy-hugoy sa kaparehas nilang mga bata.