Kampanya ni Leni

Pakusgan pa ang programa sa rehabilitasyon alang niadtong naadik sa ginadili nga druga ug dili ang mga operasyon sa mga law enforcement agency nga mosangpot lamang sa dugang extrajudicial killings.

Mao unya kini ang kampanya ni Bise Presidente Leni Robredo human siya gitudlo ni Presidente Rodrigo Duterte isip co-chairperson sa Interagency Committee on Anti-illegal Drugs o ICAD, nga maoy nag-unang buhatan sa krusada batok sa druga.

Usa sa nag-unang kritiko sa administrasyon ni Duterte, ilabina sa kumbati niini batok sa negosyo sa ilegal nga druga, gidawat ni Robredo ang hagit sa Presidente nga maoy mangulo sa maong kampanya pagsumpo sa maong problema.

Apan iyang dakong tumong moa nga wala nay mamatay atol unya sa mga operasyon sa kapolisan ilalum sa iyang pagdumala sa kampanya.

Sukwahi kini sa agresibo nga approach sa administrasyon ni Duterte diin liboan na ang nangamatay.

Hinuon dakong pangutana kun mosaler ba ang tumong ni Robredo nga zero-casualty campaign batok sa negosyo sa druga.

Daghan ang nagpanglingolingo kon unsa unya ang matang sa iyang estratehiya nga dili mosangpot sa dugoon nga panghitabo.

Dili ba nga matag operasyon sa kapolisan usahay moulbo gayud ang engkwentro tali kanila ug sa mga drug pusher ug dealer.

Kini tungod lagi kay mga armado man kining mga nalambigit sa maong negosyo ug nga mobalos gayud kon maapiki. Mao nang dili gayud malikayan ang mga casualty.

Karon, gusto sa bise presidente nga ang rehabilitasyon sa mga drug addict maoy pahugtan ilalum sa iyang pagdumala sa kampanya.

Nagpasabot ba kini nga momenor usab ang operasyon batok niadtong nalambigit sa druga aron kalikayan ang mga casualty?

Kun mao kana, wala koy nakitang kalampusan niining iyang kampanya. Kay kun lugakan ang mga operasyon, aw padayon gyud ang sirkulasyon sa druga. Angay nga balanse ang maong kampanya.

 Kun pahugtan ang rehabilitasyon, angay usab nga pakusgan pa ang paggukod niadtong mga nalambigit sa druga.