EDITORYAL - Leksyong gikan kang Gokongwei

Tinuod nga daw nawad-an og usa ka lig-ong haligi ang sektor sa patigayon sa Pilipinas ilabi na sa Sugbo tungod sa pagtaliwan na sa Sugboanong si John Gokongwei Jr. niadtong Sabado.

Pipila lang kaha ang nasayod nga si Gokongwei nga maoy founder ug chairman emeritus sa JG Summit Holdings, Inc. usa ka Filipino-Chinese nga Sugboanon ug dinhi nagdako ug nagsugod sa iyang gamay nga negosyo pinaagi sa pagpaninda sa mga tabotabo sa bukirong mga barangay sa Cebu City.

Ang JG Summit Holdings, Inc. mao ang conglomerate nga nanagiya sa mga inila karong mga kompanya dinhi sa Pilipinas.

Apil niini ang budget airline nga Cebu Pacific, Universal Robina Corp (food), Robinsons Land (property), Robinsons Bank (banking) ug daghan pang uban dili lang dinhi sa Pilipinas kondili apil na sa abroad.

Bisan tuod og siya anak og adunahan kay negosyante man iyang amahan kaniadto, wala siya magdako niini. Trese anyos palang siya dihang nitaliwan ilang amahan maong nahurot tanan nilang katigayonan hinungdan nga nagkugi siya og negosyo aron buhion iyang inahan, ug lima ka mga manghod.

Sa laktod pagkaestorya, nagsugod gyud siya sa uno pagnegosyo ug samang higayon nipadayon sa pagtungha.

Gikan sa pagka-probinsyano ngadto sa pagkahimong bilyonaryo tungod sa paningkamot.

Taas ug puno sa mga pagsuway ang iyang kinabuhi hangtud nga naabot siya sa punto nga nahimong ikatulo nga labing adunahan dinhi sa tibuok sa Pilipinas.

Dili siya hakog apan makamao siyang magtigom og kwarta ug dili magusikusik niini kay alang kaniya ang tawong di maningkamot magutom gyud. Ug labaw sa tanan, wala sa edad ang pagtuon aron makat-on.

Usa sa mga maayong mithi nga angayang sundon sa kabataan gikan sa kinabuhi ni Gokongwei mao ang iyang walay kahadlok nga pagdawat sa mga hagit bisan og walay kasigurohan ang resulta kay alang kaniya dili tanang pabor naa sa tawo apan bisan pa niini angay makat-on kun unsaon pagdaog bisag bati pa ka og baraha.