Pakigbatok sa mga dautan

Gitay-og ang peace and order sa Sugbo sa nahitabong pagpanulis sa usa ka mall sa dakbayan sa Mandaue diin giransak sa 12 ngadto sa 15 ka mga armadong tawo ang mga jewelry stores, pawnshop ug money changer sulod sa mall.

Gitilok gyud sa mga tulisan ang mga alahas ug salapi sa mga establismento nga ilang gibiktima.

Mikabat sa 136 milyones pesos nga kantidad sa mga alahas ug salapi ang nasakiyo sa mga tulisan nga dali ra kaayo mihimo sa krimen.

Apan dali ra usab kaayo sila nadakpan sa mga otoridad nga misangpot gani sa kamatayon sa upat ka mga suspek apil na ang lider nga si DC Glen Tairus.

Ang grupo nag gikan sa Ozamis kinsa gitoohang mga gaway kaniadto sa Ozamis robbery group nga mipalig-on sa ilang grupo sa paghimo sa krimen sa nagkadaiyang dapit.

Naa pay nakasibat nga upat ka mga miembro sa grupo kinsa mao ra karon ang nabulahan sa ilang mga tinulisan nga mga alahas ug kwarta.