Ubang guwardiya dili andam

Wala gyuy bisan usa ka guwardiya nga nakasukol sa mga tulisan nga nanulis sa money changers ug jewelry stores sulod sa mall sa Mandaue kaniadtong Sabado sa gabii.

Dili ba kaha nga nahadlok ang mga guwardiya pagsukol sa mga tulisan kay dili nindot ang ilang mga armas, ug limitado ra ang ilang nga bala?

Nakabantay man gud ko nga adunay mga guwardiya nga sakop sa lainlaing ahensya nga walay klarong armas, mga depektuso ug nihit kaayo’g bala.

Abi ninyo og ngano? Daghang ahensya sa mga guwardiya dili moisyu og mga bala ngadto sa ilang mga security guards. Nagpasabot nga ang mga guwardiya maoy mogasto sa ilang mga bala.

Tungod kay dili man sab kaayo dagko ang sweldo sa mga guwardiya, daghan kanila ang nagtinil lang tawon og pipila ka bala para sa ilang armas.

Nisulod ko og bangko ug naamigo nako ang guwardiya ug  gitugotan ko niya nga makahiling sa iyang isyu nga armas. Aw, oki ra man ang armas apan may tulo ra tawon ka bala.

Kun dunay motulis sa maong bangko, makasalig ka kaha nga mosukol ang maong guwardiya? Labing siguro nga ang maong guwardiya moisa ra sa iyang kamot.

Makapangutana ko nganong dili man moisyu og bala ang mga security agency ngadto sa ilang mga guwardiya? Pananglit maibanan ang bala sa ilang mga guwardiya, sutaon nila kun unsay gigamitan sa pagpabuto.

Unta, ang PNP Firearms and Explosives, Security Agency and Guards Services, motan-aw niining mao nga isyu. Dako kini nga anomaliya sa mga tagdumala og security agency nga wala motuman sa ilang obligasyon.

Unya, daghang ahensya sa mga guwardiya miabuso pa gyud kay ang giiban nila gikan sa sweldo sa ilang mga guwardiya subra sa 20 porsiyento sa overall contract amount.

Ang tinuod, kun estriktuhon lang sa FESSAGS  ang mga security agencies, tingali moisog ang mga guwardiya nga molaban sa ilang trabaho.

Tan-awa karon, ang kapolisan miisip na hinon sa mga guwardiya diha sa mall nga “persons of interest” kabahin sa pagpanulis sa jewelry shop ug money changer.

* * *

Ang kapolisan dinhi sa dakbayan pakyas sa paghimo og kampanya aron madakpan ang mga nalambigit sa illegal swertres operation dinhi sa siyudad.

Ambot ngano kaha nga wala man momando si Koronel Gemma Vinluan nga hugtan ang paghimo’g kampanya batok sa mga illegal swertres nga maisip gihapon nga masiao.

Ang kadagkoan sa Philippine Charity Sweepstakes Office (PCSO) nga gipangulohan ni Koronel Royina Garma nakadawat og report nga dunay nga polis dinhi sa dakbayan nga nagdawatan og payola gikan sa nga gambling lords.

Mora’g motuo ko nga may mga polis dinhi nga nagdawat og payola sa nga tigpasiugda sa illegal swertres ug mao nga wa gyud sila molusad og operation batok sa maong illegal gambling. Bisan gani si Major Chuck Barandog nga nadestino na sa PCSO apilon man gani unta sa pagsuborno og tag P15 mil ang semana, apan maayo kay gibalibaran ni Barandog.

May suwat si maam Garma nga gipadala niya kang Brigadier General Valeriano de Leon ug nagbutyag sa mga report nga iyang nadawat kabahin sa mga nagpadagan og illegal swertres dinhi sa Sugbo.

Si Mayor Edgardo Labella mimando na ni Koronel Vinluan nga molusad og “all-out war” batok sa mga illegal swertres dinhi sa siyudad. Paabuton nato ang resulta.